Ingimar bullar og bullar

Revenge of the nerds

2010-09-30T21:00:00.004Z

Hver man ekki eftir þessari mynd... nú ok ekki, jæja skiftir ekki máli. En það kannast flestir við bandarískar háskólamyndir með öllum sínum klíkum og hópum með öllum sínum undirförlu brögðum og aðferðum við að ota sínum tota og koma höggi á hinar klíkurnar.
Mér finnst nefnilega hálfpartin eins og ég sé að fylgjast með einni slíkri núna þegar ég fylgist með störfum alþingis. Allt sem ég sé eru klíkur sem býsnast yfir hvor annari og fara í hefnileiðangur til að hefna fyrir hefnileiðangurinn sem hin klíkan var í til að hefna fyrir síðasta hefnileiðangur....

Ríku flottu ljóshærðu velvöxnu strákarnir sem alltaf hafa ráðið öllu í skólanum misstu völdin til sætu ljóshærðu sólbrúnu stelpnanna sem, til að missa ekki aðgangin að bestu heimavistinni, ljósabekkjunum, klappstýrubúningunum og fleiru yfirborðskendu, mynduðu bandalag með furðulega liðinu sem þykir alltaf svo brjálæðislega vænt um öll blómin og dýrin að þau gleyma stundum fólkinu.
Minni klíkurnar fylgjast svo með og reyna að taka þátt. Gothic klíkan talar furðulega, meira að segja við hvort annað og hegðar sér enn furðulegar svo engin skilur neitt þeirra, meira að segja ekki þau sjálf. Þau eru samt alltaf að halda ræður, þau þeirra sem ná uppfyrir púltið. Svo er það gengið sem hékk alltaf með ríku flottu strákunum en er ekki alveg viss um hvernig á að haga sér núna. Voru miklu vinsælli og mikilvægari, en flestir hafa haft þá útundan og kennt þeim um að allir í skólanum fengu miklu hærri einkunnir en þeir áttu skilið. Sem veldur því núna að útskriftarskírteinin eru ekki tekin gild í neinum háskólum í öðrum löndum og engin treystir neinum sem útskrifast úr þessum helv... Icewitch skóla!
Svo núna datt nemendafélaginu, eða réttara sagt skákklúbbnum, að fara framá að aðal ríki flotti ljóshærði velvaxni strákurinn yrði skammaður fyrir að sjóður nemendafélagsins hvarf úr kassanum sem þeir og ljóshærðu stelpurnar voru að passa. Allir hinir ríku flottu ljóshærðu velvöxnu strákarnir urðu brjálaðir út í stelpurnar, af því að þær voru jú að passa kassan líka, öskureiðir út í blómaliðið, og rosa sárir út í nokkra genginu sem höfðu alltaf hangið með þeim.
Í framhaldinu eru allir farnir að rífast um hvort það hafi yfir höfuð verið nokkuð svo mikið í kassanum eða jafnvel að kassinn hafi verið frekar illa smíðaður af RFLVS og genginu á sínum tíma og því verið alltof auðvelt að stela úr honum. Svo heyrist líka að allir RFLVS ætli ALDREI aftur að tala við nokkrar af sætu stelpunum og algjörlega hunsa suma úr genginu. Allavega virðist engin hafa áhyggjur af því hvernig á að redda þeim hlutum sem nota átti sjóðinn til að borga fyrir.
Ég vona að klíkurnar jafni sig fljótlega svo hægt sé að gera eitthvað sem skiptir máli. Það er auðvitað drullufúlt að þurfa taka til eftir partíin og jafnvel að borga fyrir gjafirnar sem maður splæsti á liðið og allt snakkið og gosið!

Þetta gera nú samt flestir sem ekki eru í klíkum og þeir passa jafnvel líka uppá að allir komist heilir heim og hafi jafnvel nesti þangað til næsta partí byrjar.
Já sjálfsagt er til fólk í klíkunum sem hugsar ekki bara um klíkuna sína eða sjálfa sig.

Ha ha..

2009-12-15T20:55:00.005Z

.. þið hélduð að ég væri hættur! Að vísu hélt ég það líka, en ákvað fyrir skömmu (5mín) að prófa setja inn hérna einhverja gullmola sem (ef vel heppnast) gæti síðan gerst af og til. Það er ekki eins og það alltaf verið að trufla mann með símhringingum eða heimsóknum hérna á Fáskrúðsfirði. Nóbb alveg laus við það takk fyrir takk.

Ýmislegt hefur nú átt sér stað frá síðustu færslu. Fyrst má nefna að í pólitíkinni hefur verið fjallað um Icesave og ............... já um Icesave. Man ekki eftir fleiru af hinum opinbera vettvangi í augnablikinu.

Af okkur er það helst að frétta að eftir að ég réði mig hjá Johan Rönning í júní, sem hefur verið ljómandi fín vinna, hef ég hitt fjölskylduna samanlagt kannski í þjár vikur. Það er ca 20 vikum of lítið fyrir minn smekk á þeim tíma. Það verður ljúft að ná nokkuð góðum tíma um jól og áramót.

Við Inga ákváðum að gifta okkur núna í haust og fengum til þess verðlaunaljósmyndara sem framkvæmdi athöfnina með sóma. Þetta var frábær stund með okkar nánustu í Prestbakkakirkju þann merkisdag 10.09.09 og ekki skemmdi fyrir að nokkrir gestanna fóru ríðandi til kirkju ásamt betri helmingnum af brúðhjóninu!

Haustið hér eystra hefur einkennst af töluverðum rigningum og skúrum í grend, en í sumar aftur á móti var meira um svona skýfall af og til hér og þar. Verður virkilega spennandi að sjá hvernig úrkoman hegðar sér næstu misseri. Ef þetta fer ekki að lagst hafa menn hér um slóðir ákveðið að sækja um aðstoð ofanflóðasjóðs....

Læt þetta nægja að sinni hér á þessari síðu.

Já það má nefna það í leiðinni að ég var að byrja aftur að setja inn myndir á myndasíðuna okkar. Tekur tíma að tína þangað inn og enn lengri tíma að skrifa eitthvað "sniðugt" við þær líka, en hefst vonandi allt saman.

Þar til næst hafið það sem best.

Sir Pryce

2009-01-18T12:28:00.005Z

Já ég varð ekkert smá hissa í gærkvöldi þegar við Inga skruppum til Þórólfs að spila og spjalla. Átti von á að hitta pabba og mömmu og Kalla og Steinu. Þegar ég labba upp stigann og er að spjalla við Katrínu og rétt búinn að reka hausinn uppfyrir handriðið er bara öskrað; SÖRPRÆÆÆÆÆÆSSS. Ég missti andlitið, úr eitt slag, málið og ýmislegt fleira án þess þó að missa neitt í buxurnar, fölnaði upp og vissi ekkert hvað ég átti að gera. Þarna voru samankomnir mínir nánustu ættingjar og vinir með freyðivín og fjör til að skála fyrir útskriftinni minni í gær. Betri útskriftargjöf hefði ég ekki getað hugsað mér.

TAKK KÆRLEGA FYRIR MIG

Svona eftirá gat ég alveg séð fullt af hlutum sem að komu ekki alveg heim og saman sem tengdust þessu leynimakki, en það bara hvarflaði ekki að mér eitthvað svona. Erla Dagmar var líka veik og kannski ekkert rosaspennandi að fara frá henni, en þetta var virkilega vel heppnað verð ég að segja.

Annars er unga daman að hressast held ég og ég verð einnig búinn að jafna mig þegar líður á vikuna. Útskriftin sjálf var líka bara vel heppnuð og var frábær tilfinning að taka við skýrteininu. Nú tekur alvaran við, sem verður kannski ekki eins og maður var búinn að sjá fyrir sér en það rætist úr þessu vonandi fljótlega.

Glöggir vefvafrarar gætu hafa tekið eftir því að fáar færslur hafa verið hér undanfarið ásamt því að ekki hafa verið settar inn myndir síðan í haust. Hugmyndin er að bæta úr þessu fljótlega þar sem eitthvað verður um lausan tíma hjá mér.

Núna ætla ég að jafna mig aðeins betur á gærkvöldinu og sendi öllum góðar kveðjur með ósk um gleðilegt ár 2009.

Lokið

2008-12-19T09:02:00.004Z

Eitthvað hefur tækni(fræðin) verið að stríða mér, hef bara ekki náð að skrifa neitt hér í nokkurn tíma. Ýmislegt kemur til og þar á meðal vinna við lokaverkefni mitt í rafmagnstæknifræði. Nú hefur mér á einhvern ótrúlegan hátt tekist að ljúka því, kynna og verja. Skólagöngu lokið. Útskrift í janúar. Jeiij.

Annars er bara ágætt að frétta hjá okkur, við skólakrakkarnir komin í jólafrí sem sagt á meðan Inga er að vinna. Við förum síðan á mánudaginn til Vestmannaeyja og verðum hjá Hörpu, Elvari og Emilíu um jólin. Erlu Dagmar hlakkar mikið til að fá að leika við Emilíu, spranga og svoleiðis. Það verða ljúfir dagar um jólin hjá okkur allavega.

Núna þarf að klára jólaundirbúning og gera allt klárt fyrir brottför.

Bið að heilsa ykkur að sinni og óska öllum gleðilegra jóla.

Skilanefnd..

2008-10-10T17:12:00.003Z

..hefur tekið yfir þetta blogg. Ég fæ þó að rita einstaka línur hérna en þær eru allar ritskoðaðar. Ég hef ákveðið, vegna fjölda áskorana, að setja inn hérna nokkrar línur svona til að láta vita að við erum ekki fallin! Töluvert mikið hefur gerst frá síðustu færslu og væri of langt mál að fara í gegnum þá hluti hér. Ætla ég þó að nefna hestaferð Kjörseyrargengisins sem farin var um verslunnarmannahelgina og varð Húnaþing vestra að þessu sinni fyrir valinu. Gert var út frá Klömbrum þar sem vel var um okkur séð. Þetta var hin besta skemmtun og voru allir ánægðir með túrinn. Ég setti inn nokkrar myndir frá ferðinni.

Þá hefur fjárdráttur og rekstrarerfiðleikar sett mark sitt á síðustu vikurnar þar sem bæði voru fyrsta og önnur leit í Fagradal og Kjörseyri. Það stefnir í að við verðum bara í bænum þessa helgina, sem væri sú fyrsta síðan ég man ekki hvenær.

Það er svo sem margt sem mig langar til að tjá mig um og ber þar hæst sú krísa sem virðist hrjá okkur þessa dagana í tengslum við peningamál. Ég verð að segja alveg eins og er að ég er alveg orðlaus............................

Þar til næst bestu kveðjur.

Kollsármót

2008-07-23T23:27:00.002Z

Þá er miklu og bráðskemmtilegu ættarmóti lokið. Þessi samverustund Ingu ömmu systkyna hennar og afkomenda þeirra stóð fyllilega undir væntingum og var virkilega gaman í alla staði. Það var skemmtileg viðbót að hafa þessa mjög svo fjarskyldu ættingja á flatsæng á gólfi félagsheimilins sem við vorum með á leigu.
Eins og þeir sem voru á mótinu vita var þetta virkilega vel heppnað og skipuleggjararnir eiga miklar þakkir skildar fyrir þetta framtak. Þarna voru saman komnir u.þ.b. 100 einstaklingar á öllum aldri frá þriggja mánaða upp í 86 ára og skemmtu sér saman alla helgina.
Þeir sem voru svo sniðugir að vera í fríi áfram, fannst það minna sniðugt aðfaranótt mánudagsins þegar verið var að troða draslinu í bílana og forðað sér burt af svæðinu vegna veðurs. Það sluppu nú allir lifandi frá þessu en hefði verið hægt að upplifa skemmtilegri útilegu geri ég ráð fyrir.
Ég læt þetta nægja að sinni. Setti inn slatta af myndum frá ættarmótinu.
Takk fyrir okkur og hafið það sem best.

Genamót

2008-07-15T22:00:00.003Z

Kollsárgenin ætla að hittast um helgina við félagsheimilið Skjöld við Stykkishólm. Þarna hjá Skyldi, skyldi maður ætla að skyldmenni skyldu skemmta sér og öðrum. Skyldumæting skyldi maður ætla!

Hafði smá bil fyrir þá sem eru að missa sig úr hlátri.
Já það verður hellingur af liði, nærri 100stk í það heila hef ég heyrt. Þetta eru sem sagt Inga amma og systkyni ásamt afkomendum sem eru nokkuð á annað hundraðið. Ef ég þekki þetta fólk rétt verður ákaflega gaman þá. Slatti af gíturum og enn meira af söngvurum, hellingur af skemmtilegu fólki í góðu skapi, getur bara ekki klikkað.
Annars er ágætt að frétta. Inga og Erla Dagmar fóru norður á sunnudaginn og koma beint þaðan á ættarmót. Þær eru í sumarfríi næstu vikur meira og minna. Við Lilja erum hér í bænum og Arnar er aðstoðarbústjóri á Kjörseyri.
Þetta reddaðist með flugið erlendis hjá okkur skólafélögunum, fljúgum bara degi seinna og styttum ferðina um sólarhring.
Ætli ég láti þetta ekki nægja í bili. Setti inn nokkrar júlímyndir áðan.
Hafið það sem best.

Ammælis

2008-06-30T15:17:00.004Z

Já það var haldið upp á tveggja ára afmælið hjá Erlu Dagmar á fimmtudagskvöldið síðasta, þó að afmælisdagurinn hefði nú ekki verið fyrr en daginn eftir. Það var fjölmennt að vanda og lukkaðist bara nokkuð vel. Afmælisbarnið sofnaði allavega þreytt og sátt seint og um síðir. Hún fór síðan með ís í leikskólann daginn eftir og bauð krökkunum á deildinni.

Þá er evrópumótinu í knattspyrnu lokið og unnu mínir menn, Spánverjar, að sjálfsögðu. Var ótrúlega notaleg tilfinning að sjá þá vinna Þjóðverjana í úrslitum. Verst að þetta skuli vera búið, það er svo gaman þegar fjölskyldan sest fyrir framan sjónvarpið og horfir á íþróttir saman ;)

Fékk skemmtilegan póst frá Iceland Express á föstudaginn. Það var tilkynning um að búið væri að fella niður flugið sem við skólafélagarnir vorum búnir að kaupa erlendis í ágúst. Það reddast vonandi á einhvern hátt.

Þótt það hljómi ótrúlega þá er ég búinn að setja inn slatta af myndum frá hinu og þessu.

Læt þetta nægja að sinni, skrifa pottþétt ekki meira í þessum mánuði.

Hafið það sem best þangað til næst.

Vaaaaaááá...

2008-06-23T23:20:00.005Z

...sagðir Erla Dagmar í morgun þegar hún æddi inn á baðherbergi þar sem pabbi hennar var að pissa. Þetta hefur hún ekki lært af mömmu sinni er ég hræddur um!
Jú jú það er sá tími mánaðarins/ársins sem maður hendi inn nokkrum línum. Það hefur ýmislegt gerst undanfarnar vikur sem vert væri að minnast á eins og hvítabirni t.d. Ég treysti mér bara ekki til að tjá mig um þau mál öll sömul þar sem að eftir að hafa lesið virt blogg þar um geri ég mér grein fyrir að þekking mín á meðhöndlun svona gæludýra er ekki fyrir hendi. Hélt í alvöru að þetta væru hættuleg dýr, en hvítabjarnabloggsérfræðingar hafa leiðrétt þann misskilning minn.
Það mætti líklega minnast á eldsneytisverð, en það þarf meira hraðskrifandi mann en mig til að halda í við það.
Einnig væri hægt að nefna lækkun krónunnar, lækkun krónunnar, lækkun krónunnar...... æ ég næ heldur ekki að halda í við þetta!

Ég lenti í því fyrir rúmri viku að það réðst gámur á afturrúðuna á bílnum hjá mér! Að vísu slapp bíllinn sjálfur þó að rúðan hefði brotnað. Skil ekki enn hvernig þetta gerðist, en það var bakkað á......
Eitthvað skemmtilegra. Við fórum á Rútstún á 17. júní og skemmtum okkur stórvel. Frábært veður og hrikalega skemmtileg ræða hjá Gunna Bigga Bæjó! Eeeee fín skemmtiatriði allavega.

Nú eru að verða komin tvö ár síðan Erla Dagmar kom í heiminn. Henni tókst að fá hjartað til að taka aukaslög þá og hefur alveg hæfileikana í það ennþá. Hún verður sem sagt tveggja ára á föstudaginn og ætli við höfum ekki kökur fyrir nánustu á fimmtudagskvöldið.

Mamma á afmæli í dag, rúmlega sextug svona eins og ég er rúmlega þrítugur. Innilega til hamingju með daginn.

Já það styttist nú í að fleiri myndir bætist á vefinn, en þegar vandað er til verka vill þetta oft taka lengri tíma ;-)

Bið að heilsa í bili og hafið það sem best.

Duglegur......

2008-05-22T23:24:00.003Z

.. er kannski ekki alveg rétta orðið yfir frammistöðu ritarans hér á þessari síðu, meira svona óskrifinn! Það er svo sem ekki ýkja mikið að frétta, en rennum í gegnum það helsta.

Skólinn búinn hjá mér og Lilju, skólaslit hjá Arnari á laugardaginn.
Ég er byrjaður að vinna, teikna og fleira skemmtilegt.
Sauðburður er búinn í Fagradal, langt kominn á Kjörseyri.
Þær mæðgur ætla norður um helgina í sauðburð og skólaslit.
Ég fer í óvissuferð með vinnunni á morgun.
Pabbi er kominn heim af sjúkrahúsinu og er bara hress.
Erla Dagmar er í góðum gír á leikskólanum og fór í sveitaferð í dag með þeim.
Halldór Ásgeir frændi hennar er að byrja þar um mánaðarmótin.
Ísland komst í úrslit í Eurovision.
Chelsea vann ekki meistaradeildina heldur hitt liðið.
Það má ekki keyra um á nagladekkjum lengur.
Það má aftur á móti veiða Hrefnur.
Það eru ekki komnar nýjar myndir inn á vefinn hjá okkur.
Linda og Ottó giftu sig um daginn. Til hamingju með það.
Við fórum í fermingu vestur á Ísafjörð um Hvítasunnuna, hjá Arnheiði og var mjög gaman.

Þessi upptalning er langt frá því að vera tæmandi, en verður að duga í bili. Ég skrifa örugglega eitthvað fleira hérna mjög fljótlega!
Segjum þetta gott að sinni og farið endilega varlega inní sumarið.
Blessjú.

Apríl....

2008-04-30T23:32:00.003Z

.. að verða búinn eftir smá stund. Magnað hvað þetta líður alltaf hratt allt saman! Erla Dagmar byrjar á fullu í leikskólanum í maí og var því í síðasta sinn hjá Betu dagmömmu í dag. Henni hefur liðið rosalega vel þar og kemur örugglega til með að sakna allra. Hún er búin að vera í aðlögun undanfarið og hefur gengið vel þannig að þetta lítur vel út.
Nadía fermdist á sunnudaginn og þá fékk maður helling af kökum og kruðeríi. Ekki veitir manni af, hafði áhyggjur af að síga niður fyrir hundr....... að ég væri að léttast of mikið. Hellingur af fólki eins og vanalega í þessum veislum sem er alltaf gaman að hitta. Við kíktum líka í heimsókn til Ingu Rutar, Einars og stelpnanna á laugardaginn og fengum "grillveislu" og fínerí. Voða gaman að kíkja til þeirra alltaf.
Sauðburðurinn er hafinn í Fagradal. Fer rólega af stað samkvæmt heimildum frá bústýrunni. Þórólfur er með stelpurnar fyrir vestan að hjálpa til. Við bræðurnir verðum þarna eitthvað til skiptis eftir aðstæðum.
Ég er búinn að gera við bílinn eftir að það fór að rjúka úr vírum í stýrinu þegar Lilja var í æfingarakstri í síðustu viku. Ég skildi ekkert í því þegar hún snarbremsaði allt í einu og rak upp óp, ég sá enga biðskyldu, umferðarljós, löggu eða bíl í næsta nágrenni. Þá liðaðist bara þessi huggulegi reykur upp frá stýrinu. Við komumst klakklaust heim um kvöldið og síðan voru keyptir varahlutir og bíllinn kominn í lag. Fín æfing samt fyrir Lilju að bregðast við óvæntum aðstæðum!
Jæja segjum þetta í bili, skrifa ekkert meir fyrr en í fyrsta lagi í næsta mánuði.
Hafið það sem best.

Gengið!

2008-04-21T15:21:00.004Z

Jæja það hefur gengið á ýmsu frá því ég setti inn færslu hér síðast og má þar helst nefna að páskarnir eru loksins búnir! Siggi bró og Ines eru búin að eignast strák. Karl Ingi og Steina eru búin að eignast stelpu. Það er búið að skíra Indriða Rökkva. Veturinn virðist vera búinn. Já og svo eru prófin búin. Búið að ferma slatta af frændskystkynum og slatti eftir. Og svona mætti lengi telja.
Jebb hefur liðið smá tími frá því ég bullaði síðast! Annars er alveg ágætt að frétta svo sem. Búið að vera nóg að gera þannig að ég hef veri óvenju óduglegur hér á síðunni.
Erla Dagmar er búin að fá inni á leikskóla og byrjar í maí. Fór í morgun í fyrsta skipti í aðlögun og gekk ágætlega. Verður voða gaman hjá henni að geta hamast úti svona í góða veðrinu. Hún hefur það reyndar ljómandi gott hjá Betu dagmömmu og verður hennar sárt saknað.
Var að byrja í morgun í þriggja vikna kúrs sem teku u.þ.b. þrjár vikur! Vonandi nær maður að klára þau verkefni sem honum fylgja fyrir Hvítasunnuna. Síðan fer maður að vinna fljótlega eftir það. Er búinn að ráða mig í vinnu hjá Verkfræðistofu Jóhanns Indriðasonar og verður gaman að glíma við einhver verkefni þar í sumar.
Jæja svo þið fáið ekki leið á hvað ég skrifa mikið og oft þá læt ég þetta nægja að sinni. Setti inn slatta af myndum sem reyndar á eftir að skilgreina nákvæmlega en þið reynið að njóta þeirra engu að síður.
Bestu kveðjur.

Páskarnir

2008-03-19T08:29:00.002Z

eru að bresta á. Við hæfi er á svona tímamótum að rita nokkrar línur hér inn, einnig vegna fjölda áskorana! Ýmislegt hefur gerst síðan síðasta færsla datt hér inn, sem er að vísu nokkuð langt síðan.

Það fjölgaði í Grafarkotsfjölskyldunni þegar Kolla og Raggi eignuðust dreng, jebb alveg satt það er strákur, til hamingju með hann.
Gengi krónunnar féll og hlutabréf lækkuðu og bensín/olía hækkaði!
Það var árshátíð í skólanum hjá mér föstudaginn 7. mars
Gengi krónunnar féll og hlutabréf lækkuðu og bensín/olía hækkaði!
Það var villibráðakvöld/sólarhringur veiðifélagsins Svipunnar (L&L) þann 8. mars
Gengi krónunnar féll og hlutabréf lækkuðu og bensín/olía hækkaði!
Torfi og Hildur keyptu sér nýjan bíl
Gengi krónunnar féll og hlutabréf lækkuðu og bensín/olía hækkaði!
Pabbi og mamma keyptu sér nýjan bíl
Gengi krónunnar féll og hlutabréf lækkuðu og bensín/olía hækkaði!
Við fengum lánaðan dísel jeppa um páskana
Olían fór yfir 160 kr/ltr

Margt fleira gerðist svo sem, en ekkert nálægt því eins merkilegt og upp hefur verið talið hér að framan. Ekki veit ég hvort beint samhengi er á milli þessarra atburða, en mig grunar að þetta sé allt eitt stórt samsæri.
Annars er svo sem ágætt að frétta af okkur hér á Ásbrautinni. Erla Dagmar dafnar ljómandi vel, er farin að geta labbað upp og niður stigana heima (þegar hún nennir) sem er mikill léttir. Ekki það að ég sé í slæmu formi samt, bara eins og áður hefur komið fram hér á síðunni þá er ég 10-15cm of lítill! Vonandi kemst EDI inn á leikskóla með vorinu, þó svo að það sé nú eitthvað mismunandi hvernig staðið er að hlutunum hér í Kópavogi. Ef ekki þá verður það bara í haust.
Við förum á Kjörseyri og í Fagradal um páskana. Það verður ljúft að komast í sveitasæluna þessa tæpu viku sem til aflögu er. Hafið það sem best þessa viku.
Gleðilega páska

Þorrablót

2008-02-18T23:04:00.002Z

Það var líf og fjör á þorrablóti á Borðeyri um helgina. Já það endaði með því að ég fór, Dagga var heima og passaði Erlu Dagmar og ekki möguleiki á að skipta við hana! Blótið var stórskemmtilegt eins og í þau skipti sem ég hef farið, en ég er að sjálfsögðu vel gjaldgengur á þetta blót þar sem ég er Bæhreppingur í báðar ættir, mína og Ingu ætt! Eins og áður segir var þetta ljómandi gaman og hitti maður margt fólk og spjallaði við. Nokkuð var tekið af myndum, en margar ónothæfar þar sem krakkarnir voru fulldugleg við að taka myndir af undirrituðum á dansgólfinu. Þeir sem áhugasamir eru geta nálgast myndir á síðunni hjá Sveini frænda.
Heimferðin gekk svona upp og niður, sérstaklega við Hreðavatnsskálann þar sem hola í heitapottsstærð hafði laumað sér í veginn. Náði ég að vekja þær allar í bílnum og hjartslátturinn hjá mér var ekki kominn í eðlilegt horf fyrr en við rétt náðum að sveigja framhjá tjörninni við Svignaskarð. Slapp allt fyrir horn þó ekki hefði miklu munað. Blessuð vegagerðin.
Annars er allt gott að frétta. Setti inn slatta af myndum sem hafa safnast upp undanfarið.
Læt þetta nægja í bili. Hafið það sem best.

Jæja

2008-02-14T22:59:00.004Z

Best að láta vita af sér. Viðurkenni að ég hef ekki verið sérlega duglegur í bloggheimum á þessu ári. Þetta er að sjálfsögðu argasta vanvirðing við alla mína dyggu lesendur og aðdáendur!
Það sem helst hefur borið til tíðinda undanfarið eru sennilega "fréttir" af umskiptingunum hér hinumegin við voginn, þ.e.a.s. í borgarstjórninni. Þau málefni verða ekki frekar rædd hér. Aðrir og skemmtilegri atburðir hafa átt sér stað, líkt og feiknin öll af afmælum. Þar á meðal átti undirritaður eitt slíkt og varð rétt rúmlega þrítugur einu sinni enn. Vorum boðin í nokkrar veislur og var það ljómandi gaman.
Erla Dagmar gerir fátt annað en að stækka og þyngjast. Hún er farin að tala heilmikið og rífast enn meira. Sem betur fer hnoðast hún oft upp stigana hérna sjálf, þó það taki tímann sinn.
Við förum norður á Kjörseyri um helgina og ætlar meirihluti fjölskyldunnar á þorrablót á Borðeyri. Reikna með að við Erla Dagmar höfum það huggulegt heima á meðan og kannski fær maður að smakka eitthvað súrmeti, sem hefur einhvern veginn gleymst á þessum þorra.
Engir stórviðburðir svosem aðrir sem ég man eftir að hafi gerst þannig að ég læt þetta nægja í bili. Eitthvað hefur verið tekið af myndum síðustu vikur sem bíða eftir innsetningu á netheima, sem verður vonandi fljótlega.
Þangað til næst......

Bóndadagur

2008-01-25T13:26:00.000Z

Skemmtilegt vídeó í tilefni dagsins.

2008

2008-01-08T21:12:00.000Z

Til hamingju með nýja árið öllsömul og verði ykkur það síðasta að góðu. Vonandi að flestir hafi komist klakklaust í gegnum áramótin og hafið nýtt ár með afbrigðum vel.
Við héldum áramótin í rólegheitum hér heima og buðum Huldu að borða með okkur. Hún hélt okkur síðan félagsskap nokkuð fram á nýtt ár og var spilað og hlegið og skemmt sér. Þetta var ljómandi gaman og fóru allir sælir að sofa. Reyndar fór Erla Dagmar tvisvar að sofa þar sem hún vaknaði við sprengingarnar rétt fyrir miðnættið og var eitthvað smeik. Það bjargaðist þó fyrir rest.
Nú eru skólarnir byrjaðir hjá okkur skólakrökkunum, Arnar Ingi farinn norður og við Lilja Guðrún byrjuð í okkar skólum.
Óska afmælisbörnum mánaðarins innilega til hamingju með afmælin sín. Þar sem ekkert fleira stórmerkilegt hefur gerst á þessu ári svo ég muni, hef ég hugsað mér að láta þetta nægja í bili. Ég setti inn nokkrar myndir frá áramótunum.
Hafið það sem best.

Pakk

2007-12-28T22:58:00.000Z

.....arnir opnaðir og jólin að baki. Var alveg ljómandi vel heppnað allt saman og allir sáttir við sitt. Höfðum það gott á Kjörseyri og lítið spennandi að koma sér af stað suður. Gerðum það þó þar sem Inga og Lilja þurftu að vinna og ég verð víst að líta aðeins í námsbækurnar.
Núna er eitthvað af fjölskyldunni með kvefdrullu og svaka stemming á heimilinu. Vonandi að við verðum orðin sæmilega hress á gamlárskvöld. Verðum hér á höfuðborgarsvæðinu um áramótin, borðum heima og ef veður og heilsa leyfir kíkjum við vonandi til Kalla og Steinu.
Setti inn slatta af myndum frá jólahátíðinni.
Læt þetta nægja að sinni og skrifa líklega ekki meira á þessu ári.
Þakka samfylgdina á árinu sem er að líða og sjáumst hress á því næsta.
Ssssssssssssssssjjjjjúúúúú.....ppgggggggghhhh!

Jólaglögg

2007-12-22T18:37:00.000Z

Já ég verð að segja það, Erla Dagmar er bara orðin ansi jólaglögg! Hún þekkir t.d. jólasveininn, jólatréð, jólaskrautið, jóladótið, jólapakkana og síðast en ekki síst jólastresssið! Annars hefur ekki verið neitt óhuggulegt stress á okkur fyrir þessi jólin, höfum haldið öllu í lágmarki þar sem við pökkum öllu niður og förum norður á Kjörseyri á morgun. Ég ætla að snæða skötu með vinum og kunningjum í hádeginu og Lilja er að vinna eitthvað frameftir degi. Veðurspáin er alveg ágæt eins og er þannig að við ættum nú að sleppa norður yfir heiðina fyrir jólahátíðina.
Læt þetta nægja af skrifum hér á aðventu og nota tækifærið og óska öllum þeim sem dettur í hug að kíkja hér inn, gleðilegra jóla.
Sjáum kannski einhver af ykkur áður en langt um líður.
Jólakveðjur af Ásbrautinni.

Aðventan

2007-12-19T09:25:00.000Z

Það er líklega kominn tími á að rita hér nokkrar línur. Nú er langt liðið á aðventuna og allir komnir í bullandi jólaskap, hvernig sem það er nú!
Ég er kominn í jólafrí og hef getað einbeitt mér að því að skrifa á jólakort. Er bara langt kominn með þessi 14 sem ég skrifa á. Skrapp út á pósthús í gær með pakka og keypti mér frímerki í leiðinni til að líma á jólakortin. Það væri svo sem ekki merkilegt nema fyrir það að ég hef greinilega ekki fylgst náið með þróun frímerkja undanfarið. Kom heim og byrjaði að rífa niður frímerkin á þessum gataröndum, sem er ekki neitt sérstaklega auðvelt, og byrjaði síðan að sleikja og líma á umslögin! Var eitthvað skrítið hvað límið var bragðlaust og enn skrítnara hvað þau duttu af umslögunum! Þetta kemur fyrir :)
Núna eru örugglega allir komnir í jólaskap eftir þessa skemmtilegu jólasögu. Annars gengur jólaundirbúningurinn ágætlega. Flestar jólagjafir klárar þó svo innpökkun sé ekki alveg búin. Jólatréð er komið á svalirnar. Síðan var verið að þrífa stigaganginn og var notað sag og einhver þurrhreinsun þannig að nú lyktar hann eins og risastórt hamstrabúr! Enda eru furðuverur á sveimi í búrunum inn af stigaganinum.
Siggi bróðir var á landinu um helgina og kíkti við ásamt Höbbu og Alexander Rósant. Var rosa gaman að hitta þessa þrjá ættliði og fá í heimsókn.
Læt þetta nægja að sinni.
Ég setti inn nokkrar myndir sem hafa safnast upp síðan í október.
Bestu jólakveðjur.

Pabbi............

2007-12-06T20:25:00.001Z

....geturu skutlað mér í vinnuna, ég á að mæta á stjórnarfund í Snudda Group rétt bráðum! eða; Kláraðu matinn þinn krakki; Nei ég er orðinn of seinn á stjórnarfund í Bleyjur Group!
Er þetta alveg í lagi? Er ég bara orðinn svona gamall! Eða er ég bara svona öfundsjúkur!!!!
Hvað um það ég hef nú ekki verið neitt duglegur að skrifa hérna undanfarið. Búið að vera nóg að gera í blessuðum skólanum síðustu vikur. Aðventan byrjaði víst um síðustu helgi sem getur alveg passað því einhverju sinni þegar ég átti leið framhjá heima sá ég seríur í gluggum!
Erla Dagmar búin að vera heima alla vikuna. Veik sko, með ljótan hósta og hita í tvo daga. Er nú eitthvað að hressast en verður samt heima á morgun líka. Inga fór með hana í dag til bæklunarsérfræðings. Já hljómar eitthvað rosalegt en það er allt í góðu lagi með hana. Hún átti það til að ganga bæklað..... eða virtist beyta löppunum eitthvað skakkt. Fór til sjúkraþjálfara og þaðan í bækló en er ekkert að. Að vísu, ef fótastærð getur talist til bæklunar þá virðist aumingja barnið hafa erft snjóþrúgustærðina frá föður sínum. Nei segi svona.
Við höfum ákveðið, í nánu samráði við heimilisfólkið á Kjörseyri, að dvelja þar um jólin. Verður voðalega notalegt. Hefur verið alveg ljómandi hér syðra en Inga neitaði að baka neinar smákökur þannig að við redduðum þessu svona!
Það held ég, engar myndir komið inn nýlega. Bendi ykkur á að skoða myndir hjá öðrum sem eru duglegri við þetta en ég.
Aðventukveðjur

Slökun

2007-11-25T20:40:00.000Z

Þá er prófatörn lokið í bili og varð hálfgert spennufall eftir hádegið á föstudaginn. Held að þetta hafi gengið bærilega, en ætla ekkert að fullyrða fyrr en niðurstaða kemur úr þessu öllu saman. Í fyrramálið hefst þriggja vikna kúrs sem stendur víst næstu þrjár vikurna, merkilegt nokk! Var notalegt heima um helgina og bara rólegheit hjá okkur.
Annars er allt ágætt að frétta héðan. Allir hressir og kátir. Styttist í próf hjá hinum skólakrökkunum á heimilinu. Erla Dagmar dafnar alltaf jafn vel, þó varð hún svoldið horuð um helgina en það var ekki hættulegt.
Veðrið er alveg að gera mann brjálaðan. Hrikalega óákveðinn gaurinn á bak við tjöldinn sem stjórnar þessu. Sól, rok, logn, frost, hiti, snjór og rigning á einum sólarhring...... eigum við að ræða þetta eitthvað frekar. Nei ég hélt ekki.
Segjum þetta gott í bili, farið varlega í jólaseríurnar.

Próf.....

2007-11-13T19:36:00.000Z

.... eru byrjuð hjá mér, það fyrsta var í morgun og held það hafi nú sloppið fyrir horn. Klára þetta næsta hálfa mánuðinn og þá er eftir þriggja vikna kúrs fram að jólum. Síðasti kennsludagur var á föstudaginn og hann endaði á því að við fórum nokkur í skoðunarferð í flugskýli út í Kef. Það var þrælgaman og fróðlegt (nei það var ekki boðið upp á bjór) að sjá þetta allt saman. Tók nokkrar myndir af dótinu þarna.
Fórum í afmælisveislu upp í Rofabæ á sunnudaginn. Auðbjörg Erla varð 6 ára þann 30. okt síðastliðinn og ekki vannst tími til að halda uppá það fyrr en þann 11.11. Það var reyndar ekki slæmur dagur því afi hennar varð 75 ára þennan dag. Innilega til hamingju bæði tvö. Hekla Dögg mætti í ammælið með fjölskylduna sína. Var reyndar sofandi allan tímann og sumir vildu helst leika með "dúkkuna" sem var í bílstólnum. Inga amma/langamma var að sjálfsögðu mætt, eldhress að vanda. Nóg af kökum og kruðeríi sem betur fer því það yrði ægilegt ef maður nálgaðist kjörhæðina aftur!
Eins og áður hefur komið fram þá eru prófin byrjuð. Vænta má að ekki megi vænta mikils bulls næstu vikur en ég lofa þó ekki neinu.
Þangað til næst.

Gaman

2007-11-06T22:15:00.000Z

Gaman að segja frá því að Liverpool var að vinna Besiktas 8 - 0 í meistaradeildinni í kvöld og settu nýtt met í leiðinni :)
Annars hef ég verið frekar latur í ritflæði hér á síðunni undanfarið, . Brjáluð verkefni í skólanum og bara einhvernveginn nóg að gera. Ég prófaði svoldið í dag sem ég get ekki mælt með fyrir þá sem þjást af innilokunarkennd! Segulómskoðun er ekki málið, allavega átti ég frekar bágt með mig inn í þessum hólk. Að vísu viðurkenni ég það að ef líkamshæð mín væri eðlileg þá hefði ekki verið eins þröngt um mig þarna, en alveg sama.
Erla Dagmar alltaf jafn dugleg. Farin að tala ennþá meira og segir t.d. nei og svo, Nei og NEi og farin að ná tökum á NEI og MÍNA. Hörkudugleg!
Annars röltir lífið sinn vanagang, veturinn kíkti við hérna í síðustu viku. Held hann hafi fokið burt eða rignt í kaf. Nagladekkin hafa allavega ekki fengið að njóta sín undanfarið!
Fengum heimsókn á laugardagskvöldið. Harpa og Emilía kíktu ásamt Brynju, Victori og Birtu. Síðan voru þær systur Melkorka og Guðlaug í næturgistingu hérna. Inga sauð slátur í massavís ofaní liðið, með smá pizzuívafi að vísu. Þetta var fjör og sumir fóru á töluverðan yfirsnúning. Setti inn nokkrar myndir af þessum degi.
Látum þetta nægja að sinni.
Hafið það sem best.

Hekla Dögg

2007-10-24T14:36:00.001Z

Óska Ingu Rut, Einari, og Hönnu Björgu innilega til hamingju með nýjasta meðlim fjölskyldunnar, Heklu Dögg, sem fæddist í fyrrinótt. Stúlkan er bráðmyndarleg líkt og eldri systir hennar. Foreldrarnir eru ekkert svo útlitsgallaðir heldur :-)
Sniglabandið fékk því miður ekki að njóta nærveru þeirra á útgáfutónleikum sínum í gærkvöldi vegna þessarar skyndákvörðunar ungu dömunnar. Við Inga vorum búin að bóka okkur með þeim, en Agnar og Birna hlupu í skarðið og við skemmtum okkur öll konunglega á tónleikum þeirra rugludalla. Þeir fóru hamförum á sviðinu og settu upp nokkur skemmtileg atriði sem mikið var hlegið að. Takk fyrir okkur.
Aftur á móti gekk frekar hægt að komast heim af tónleikunum þar sem einhverjum snillingi hafði dottið í hug að opna partasölu fyrir BMW á miðri Kringlumýrarbrautinni og þurftum við að fara töluverðar krókaleiðir til að komast heim. Hafðist allt að lokum og mildi að engin skyldi hafa farið virkilega illa út úr þessum verknaði.
Segjum þetta gott í bili.

Mýrin

2007-10-21T23:26:00.000Z

Við afrekuðum það um helgina að sjá Mýrina, þá er ég að meina myndina sem gerð er eftir samnefndri bók eftir Arnald Indriðason. Stórskemmtileg til áhorfs verð ég að segja, jafnvel þó maður hafi lesið áðurnefnda bók líka.
Arnar Ingi kom suður um helgina, er að fara í fyrramálið aftur, og var virkilega gaman að hafa "fullt hús" aftur þó ekki væri nema þennan stutta tíma. Rosa gaman hjá honum í skólanum fyrir norðan og er hæst ánægður hjá afa sínum og ömmu í sveitinni.
Erla Dagmar verður hraðskreiðari með hverjum deginum og nær að byggja upp nokkra spennu af og til meðal annarra á heimilinu um hvort það bætist við sár á nefið eða kúla ennið í næsta spretti. Það er síðasti tíminn í ungbarnasundinu í næstu viku en hún er, líkt og hér heima, orðin svoldið glannaleg í ýmsum aðgerðum þar.
Var að bæta inn nokkrum myndum á myndasíðuna, bara svona fyrirbyggjandi nöldurvörn!
Segjum þetta gott í bili.

Eplakaka!

2007-10-10T20:55:00.000Z

Já hún Erla Dagmar er bara orðin altalandi, farin að segja góóóór (skór) úúaa (húfa) úbba (úlpa) og margt fleira. Það nýjasta er eplakaka (Erla Dagmar) er hún ekki dulle :-) Hún er orðin hinn mesti gönguhrólfur og dröslast hérna um íbúðina og prílar upp stigana hérna í blokkinni líka. Það tekur að vísu það langan tíma að hún missir af kvöldmatnum þegar hún kemur heim frá dagmömmunni.
Lífið gengur sinn vanagang hér um slóðir og fastir punktar í tilverunni, eins og t.d. Gunni BiggaBæjó (eins og við köllum hann hérna) er að rífast við skipulagsstofnun þar sem allt nöldur var búið í bili út af Kársnesinu. Hrikalega óheppinn að eiga ekki hlut í Orkuveitunni.
Alveg frábært að geta séð kvöldvélunum frá Akureyri bregða fyrir, fyrir ofan Viðey þegar þær koma inn til lendingar. Þessi "súla" hefði nú hentað betur hérna í Kópavogi að mörgu leiti. Þetta er jú súla, að maður tali nú ekki um Yoko sem smellpassar inn í öll þessi frumlegu fyrirtækjanöfn hér um slóðir. En það þýðir ekki að nöldra yfir því þar sem gamli góði Villi náði að landa þessu, enda gríðarlega góður samningamaður þar á ferð.
Ég setti inn slatta af myndum fyrir stuttu, svona fyrir þá sem eru að nöldra yfir því ;-)
Jæja nóg bull í bili, hafið það sem best.

Amma kom í leitirnar!

2007-10-01T20:39:00.000Z

Seinni leit var haldin hátíðleg um helgina, norðan lands og vestan. Við amma fórum saman í sveitina á bjútíboxinu hennar og það var alveg sama hvar við stoppuðum til að kaupa eitthvað, alltaf þurfti hún að veifa seðlum eða kortum framan í afgreiðslufólkið án þess að ég fengi rönd við reist. Meira að segja þegar ég ætlaði á klósettið í Borgarnesi á suðurleið, lét hún mig hafa 500kr "svona til öryggis" eins og hún orðaði það minnir mig. Mögnuð hún amma.
Leitirnar gengu ljómandi vel og síðast þegar ég frétti voru ekkert svo margar rollur til sýnis upp í klettum. Við sluppum heim fyrir rigningu og þoku á laugardeginum þannig að þetta var hið besta mál. Frábært veður á sunnudeginum sem gerði það ekkert auðveldara að yfirgefa svæðið.
Erla Dagmar var veik alla síðustu viku og fór því ekkert til dagmömmunnar. Byrjaði aftur í morgun og er orðin hress. Ótrúlega frek samt, er víst frá mér skilst mér! Hún er farin að labba um íbúðina, en fer afskaplega varlega svo ekki sé meira sagt. Er allt að koma og verður æðislegt þegar hún fer að fara hjálparlaust upp stigana hér í blokkinni!
Inga Rut og Einar voru að flytja í nýju íbúðina sína fyrir rúmri viku. Til hamingju með það. Berglind og Gunni voru að flytja úr sinni um helgina. Til hamingju með það.
Valur varð íslandsmeistari í knattspyrnu karla um helgina. Til hamingju með það. Þjóðverjar urðu heimsmeistarar í knattspyrnu kvenna um helgina. Svona er lífið!
Gott í bili, hafið það sem best.

Autumn Onions

2007-09-26T22:09:00.000Z

Góðan dag. Í þessum fyrsta pistli mínum, af 34 í röðinni "Gróður er góður", mun ég fjalla um haustlauka eða autumis onionusmus eins og þeir kallast á fræðimáli. Eins og nafnið gefur til kynna er alveg kjörtími til að setja niður haustlauka, jú alveg rétt, á haustin. Ef við setjum þá niður á veturna, vorin eða sumrin líka, væru þetta ekki haustlaukar eða eins og þeir eru kallaðir innan sérfræðingageirans, autmonus oninus.
Það er margt sem þarf að huga að þegar haustlaukar (autmunis ojojnus) eru settir niður (á haustin) eins og t. d. að hafa mold eða jarðveg einhverskonar til að setja þá í. Þetta er afar mikilvægt en er jafnframt einn algengasti hluturinn sem fólk klikkar á.
Þá er ekki síður mikilvægt hvernig þeim er snúið. Lang best hefur mér reynst að snúa þeim rangsælis í u.þ.b. 33 hringi eða nálægt 45 sek. Þetta er að sjálfsögðu ekki hratt enda eru þeir seinþroska og blómstra ekki fyrr en á vorin.
Afar mikilvægt er að nota góðan áburð og mæli ég með Noveiainain handáburði bæði fyrir og eftir aðgerð.
Athugið að ef þið viljið fá einhverja sérstaka tegund upp á vorin, er sterklega mælt með að valin sé laukur sem lítur svipað út á mynd til að setja niður. Vona að þetta komi að góðum notum.
Þangað til næst, blómstrandi kveðjur.

Fundið!

2007-09-18T18:27:00.000Z

Já það fundust nokkrar rollur um helgina, enda er maður alveg hrikalega "findinn". Það var nokkuð kalt og sérstaklega var maður veður og vindbarinn eftir stutta dvöl út í Skarðsrétt á laugardagskvöldinu. Af nógu var þó að taka til að halda á fólki hita og slapp þetta allt fyrir horn (á þessari annars nokkuð svo hringlaga rétt)! Lauk útkeyrslu fjársins um kl 22 og þegar heim var komið, var tekið til við að syngja ótæpilega og drekka af hjartans list. Grátt var orðið niður hlíðar fjalla á sunnudagsmorgunn og notalegt að þurfa ekki að þvælast þar um.
Öll hin í fjölskyldunni voru á Kjörseyri og fundu líka helling af rollum. Þar gekk allt ljómandi vel þrátt fyrir töluverða bleytu á heiðum. Þau fóru síðan í nýju réttina á Hvalsá sem var verið að vígja sem var ljómandi skemmtilegt.
Við bíðum rosalega spennt eftir því að Erla Dagmar þori að sleppa sér alveg og labba. Hún getur það alveg en er eitthvað smeik við þetta allt saman.
Þótt ótrúlegt megi virðast þá tók ég nánast engar myndir í leitunum að þessu sinni, gengur bara betur næst.
Þangað til næst, hafið það gott.

Hvömb!

2007-09-13T19:20:00.000Z

Já er að fara vestur í leitir á morgun, en þær mægður fóru áðan norður í leitir þar. Hjótum að finna alveg helling um helgina enda hellingur til að finna! Aldrei að vita nema maður rekist á "Hvömb" eins og það er kallað sem þau Halla&Gummi eru að rækta hinumegin árinnar. Er að spá í að panta hjá þeim eitt með hvítlaukskeim fyrir næsta haust.
Annars eru þetta tímamótaleitir í Fagradal þar sem töluverður hellingur af rollum finnast ekki þarna aftur. Fjölmenni verður væntanlega eins og vanalega og verður sofið í öllum plássum og tjaldað út í bílskúr eins og vanalega. Búið að vera töluverð úrkoma undanfarið þannig að reikna má með jubbi&slabbi af og til, en það er bara hressandi :)
Langar að lokum að óska Kollu Stellu innilega til hamingju með þessi tvö sem hún var að eignast í vikunni! Megir þú eiga yndislegar stundir með þeim í nánustu framtíð ;)
Reynið að finna það sem þið leitið að um helgina.

Mikið var!

2007-09-06T22:23:00.000Z

Já mikið var að það kom ný færsla hérna. Ég er búinn að tapa í þessum leik, er ekki moggabloggari eins og allir "alvöru" bloggarar eru víst um þessar mundir.
Hvað um það þá er skólastarfið komið á fullt hjá öllum. Arnar norður á Laugarbakka, Lilja í MK og sá er þetta ritar er enn í HR. Gengur öllum ágætlega held ég bara.
Erla Dagmar er alltaf jafn spræk, fór í morgun í ofnæmispróf og er ekki með ofnæmi. Hún er orðin algjör hlunkur (þrekvaxin eins og pabbi sinn) enda borða þau svipað magn held ég. Hún er byrjuð hjá dagmömmunni aftur og gengur ljómandi. Við fórum í fyrsta ungbarnasundstíman í dag eftir sumarhlé. Emilía og Sveinn Mikael voru líka, ásamt öllum hinum. Verður gaman að vera með þeim næstu vikurnar.
Það var töluvert um að vera í ferðalögum í sumar og að því tilefni týndi ég til nokkrar myndir og setti inn á vefinn. Það voru nokkur helgarskrepp ásamt hestaferðum. Svo verð ég að benda ykkur á að skoða þessa mynd sem er inn á myndavefnum hjá Ingu Rut frænku. Alveg magnað hvað er til mikið af sniðugu fólki greinilega.
Læt þetta nægja í bili enda kominn með sinaskeiðabólgu af þessu öllu saman.
Hafið það sem best.

Ha....... komið haust!

2007-08-18T23:43:00.000Z

Nei ég er ekki puttalamaður, nei ég er heldur ekki búinn að gleyma lykilorðinu inn á bloggið, hef bara ekki haft mig í það undanfarið að bulla eitthvað hérna. Er svo sem ekkert stórmerkilegt að frétta, allir nokkuð hressir og Erla Dagmar stækkar, þyngist og dafnar ljómandi vel. Inga og krakkarnir fóru í hestaferð um verslunarmannahelgina og við EDI kíktum á þau reglulega milli þess sem við vorum í Fagradal. Virkilega vel heppnuð helgi í alla staði.
Núna er farið að kólna og dimmt orðið á kvöldin. Skólarnir eru að byrja hjá okkur skólakrökkunum og verið að undirbúa það allt saman. Sumarvinnunni að ljúka hjá mér, á eftir næstu viku í svona "útiálandirúntvinnuferð" og þá ætti það nú að vera búið að mestu.
Langar svona í lokin að óska Kollu&Steinu til hamingju með Reynir Björn sem fæddist þann 17. síðastliðinn.
Því miður nenni ég ómögulega að finna einhverjar myndir til að setja inn að þessu sinni og verður það að bíða um sinn.
Bestu kveðjur til ykkar allra og hafið það sem best.

Skrúðgarðurinn

2007-07-23T08:34:00.000Z

Merkilegt hvað maður er latur við að skrifa eitthvað hérna á sumrin. Ætla að setja inn nokkrar línur fyrst ég er staddur heima.
Byrja á að óska Kópavogsbæ til hamingju með skrúðgarðyrkjumeistarann sem bærinn virðist hafa fengið til að stjórna umhirðu okkar yndislegu hljóðmanar hér fyrir utan. Þetta metersháa gras sem blasti við í vesturhlíðum áðurnefnds mannvirkis er fallið. Þetta gerðist fyrir viku. Síðan hafa staðið ca 30 stórir svartir ruslapokar fullir af grasi hérna í garðinum. Snilldar vinnubrögð Gunni!
Sá hluti fjölskyldunnar sem staddur er hér syðra, fór í einnar nætur útilegu um helgina. Skruppum upp í Þjórsárdal og hittum þar Hörpu, Elvar og Emilíu ásamt því að Brynja og Ragna kíktu með krakkana líka. Þetta var einstaklega ljúft og verður örugglega reynt að fara eitthvað sem fyrst aftur og þá verður Arnar Ingi með líka. Erla Dagmar svaf ágætlega í svefnpoka og á vindsæng í tjaldinu svona í fyrsta sinn, en var að sjálfsögðu ekkert að sofa út frekar en vanalega. Rétt náðum að pakka saman áður en það kom sú almesta rigning sem við höfum lent í hérlendis. Endaði allt vel og þreytt en ánægt ferðafólk sem kom heim í gærkvöldi.
Læt þetta nægja í að sinni. Hafið það sem best í þessu skítaveðri sem hangi yfir landinu þetta sumarið.

Hitabylgja

2007-07-02T13:11:00.001Z

Já það er búið að vera svoldið heitt undanfarið og svona tóku kertin í stofuglugganum á móti okkur í gær þegar við komum heim eftir helgarskrepp á Kjörseyri. Ekki var síðra veðrið í Hrútafirðinum, sem er jú alþekktur fyrir gott veður, og komu einhver okkar rauðari heim en fóru að heiman! Það var ljúft að komast út fyrir borgina og megnið af liðinu var í útreiðum alla helgina. Reyndar tók rigning á móti okkur á bakaleiðinni þegar við nálguðumst Hvalfjarðargöngin og var ég næstum lentur í vandræðum þar sem ég mundi ekki hvar átti að kveikja á rúðuþurrkunum! Þetta slapp þó fyrir horn allt saman.
Afmælið hennar Erlu Dagmar var virkilega vel heppnað og þökkum við allar góðar kveðjur sem bárust og eins gjafaflóðið að maður tali nú ekki um alla sem kíktu í heimsókn. Fatahrúgan ætti að duga eitthvað fram í júlí, eða þannig! Takk.
Það var einhver frekjugangur í skilaboðaskjóðunni við síðustu bloggfærslu þannig að ég ákvað að henda inn nokkrum myndum til að friða ýmsa. Eru nú engin ósköp en ætti að duga fram eftir mánuðinum :)
Læta þetta nægja í bili og hafið það sem best.

Afmælis!

2007-06-27T09:28:00.000Z

Jú jú það er svona afmælis í dag hjá þessari ungu dömu sem hér stendur fyrir ofan. Erla Dagmar eins árs orðin og allt gengur vel. Ætlum að vera með smá kaffi og kökur í tilefni dagsins, en bara rólegt sko. Bjóðum bara systkinum okkar Ingu og þeirra fylgifiskum, mesta lagi þrjátíu manns.
Það hvarflaði ekki að mér fyrir ári síðan þar sem ég var staddur upp á Möðrudalsöræfum að lítil stúlka kæmi í heiminn þá um kvöldið. Klórslysið í sundlauginni á Eskifirði varð til þess að ég náði að vera viðstaddur fæðinguna. Ljótt að segja það en ég var þá mjög ánægður með þetta slys. Þetta er alls ekki illa meint gagnvart því ágæta fólki sem í því lenti.
Hvað sem því líður þá lukkaðist þetta allt saman og erum við öll voða hamingjusöm.
Afmælisbarnið verður að heiman á afmælisdaginn, allavega þangað til dagmamman sendir hana heim!

Haust

2007-06-25T22:51:00.000Z

Svei mér þá ef daginn er ekki farið að stytta!
Annars er ljómandi að frétta héðan, hef verið frekar óduglegur að bulla eitthvað hérna undanfarið. Það hefur margt verið að gera síðustu vikur, vinnan hjá mér slítur frídagana svoldið í sundur.
Mig langar að óska Birki og Sóley Láru innilega til hamingju með brúðkaupið á laugardaginn. Þetta var alveg virkilega vel heppnað allt saman hjá þeim, bæði athöfnin sjálf sem og veislan um kvöldið. Vel var gert við okkur í mat og drykk, skemmtilegum ræðum og frábæru balli langt fram á nótt. Svo hefði veðrið varla getað verið mikið betra og alveg ótrúleg heppni að sumarið bar upp á helgi þetta árið!
Fanney frænka fær líka hamingjuóskir með Íslandsmeistaratitilinn í tölti sem hún nældi í um helgina. Gott hjá þér Hólatútta!
Held að íbúðin hjá okkur hljóti að vera komin niður fyrir áttatíu fermetrana allavega miðað við magnið af málningu sem við erum búin að setja hér á veggina. Jú jú við erum að dunda okkur eina ferðina enn. Allt á hvolfi og rétt rúmur sólarhringur í eins árs afmæli hjá Erlu Dagmar. Magnað hvað tíminn líður hratt, hún er að verða eins árs og fór í skoðun í morgun. Er alveg að verða 10kg og komin í 73cm. Ég get samt alveg svarið fyrir það að hún virkar hátt í 20kg þegar maður er kominn með hana hérna upp stigana!
Ég nenni því miður ekki að setja inn neinar myndir núna, en bæti úr því við fyrsta tækifæri.
Læt þetta nægja í bili og hafið það sem best.

Flogið í vinnunna!

2007-06-10T17:19:00.000Z

Það er nú svo. Við fórum norður strandir og Djúpið til Ísafjarðar í síðustu viku og flugum heim þaðan á föstudaginn. Fljúgum síðan vestur aftur í fyrramálið og þá verður haldið áfram suður á Barðaströndina og jafnvel reynt að klára kjálkann fyrir næstu helgi. Það er alltaf jafn gaman að sjá nýja staði og var einstaklega skemmtilegt að koma norður í Árneshrepp og sjá Ingólfsfjörð, Norðurfjörð, Trékyllisvík og þessa staði alla. Einnig fórum við út Snæfjallaströnd sáum Kaldalón og Skjaldfannardal. Gistum meðal annars eina nótt í Heydal í Mjóafirði sem var alveg frábært, vel tekið á móti okkur, góður matur og gistiaðstaða. Einn foss af mörgum sem við sáum í ferðinni, var eftirminnilegur. Við fórum með starfsmanni vegagerðarinnar á Ísafirði inn í göngin og fengum að skoða fossinn sem þar rennur innilokaður í herbergi! Þaðan liggja svo rör út úr göngunum sem veita vatninu í virkjun í Tungudal. Alveg magnað fyrirbæri. Ótrúlega stór og mikil aðrennslisgöng samt!
Erla Dagmar fór heim frá dagmömmunni á fimmtudaginn með smá hita og var með hann fram á laugardaginn. Ekkert alvarlegt en er búin að vera frekar slöpp. Það er nú líka töluverður hiti utandyra um þessar mundir og maður svitnar nú bara við að hugsa um að hreyfa sig. Annars held ég að þær mæðgur hafi það notalegt þegar ég er svona úti á landi að vinna.
Jæja þetta er orðið full langt hjá mér að sinni.
Bestu kveðjur til ykkar allra sem kíkið á þetta.

Sumarið

2007-06-03T23:05:00.000Z

Já sumarið á víst að heita byrjað sem getur passað þar sem maður er byrjaður að vinna og skólinn búinn þetta vorið og tókst að ná öllu fyrir rest. Við Gunni farnir að þvælast um landið og byrjuðum í Vík og fikrum okkur í humátt til höfuðborgarinnar.
Ég fór í Fagradalinn um Hvítasunnuna og restin af fjölskyldunni fór á Kjörseyri. Sauðburði er nánast lokið á báðum stöðum og gekk alveg ljómandi.
Við fórum nokkrir í leiðangur með Birki frænda um helgina. Þetta kallast víst steggjun og var alveg ljómandi gaman. Ég hitti þá reyndar bara á laugardagskvöldið upp í Fljótstungu, en þeir höfðu verið á þvælingi allan daginn. Gífurlega skemmtilegt allt saman og maður er bara nokkuð þreyttur eftir þetta.
Segi þetta gott í bili, hafið það sem best.

Sauðburður.....

2007-05-24T21:20:00.000Z

... er langt kominn og ég hef lítið tekið þátt í honum þetta árið. Rétt náði að kíkja út í fjárhús á Kjörseyri síðasta sunnudag en ekkert komist í Fagradal. Kíki þangað um helgina og þau fara norður. Það verður gott að komast í sauðburðinn og kippa út nokkrum lömbum.
Var að klára skólann í morgun eða réttara sagt síðasta prófið á önninni sem var svona aukapróf til að laga síðustu einkunn, er ekkert alltof viss um að það hafi heppnast en kemur í ljós!
Setti inn nokkrar myndir áðan.
Hef þetta ekki lengra í bili, bestu kveðjur.

Já kosningarnar

2007-05-16T23:07:00.000Z

Líkt og oft áður þá sigruðu flestir í kosningunum. Sennilega rétt að óska þá bara öllum til hamingju! Það var margt merkilegt sem kom í ljós í þessum kosningum t.d. hvað margir sjálfstæðismenn verzla í Bónus og líka að margir þeirra eru á móti göngum til Vestmannaeyja!
Sá um daginn að Mbl-vefurinn tilkynnti nýtt leiðréttingarforrit fyrir bloggsíðurnar sýnar. Hef verið að skoða nokkur blogg nýlega og get ekki séð að þetta forrit virki, sama bullið allstaðar.
Heyrði í þeim heima í Fagradal í gærkvöldi og þar er sauðburður byrjaður á fullu, hundrað bornar þá. Ef maður kemst eitthvað vestur þá verður þetta langt komið væntanlega. Kemst þá kannski bara í eyjarnar og ná í nokkur flóabit – jeij.
Núna er kominn sá tími að bloggfærslum fer fækkandi. Geri nú ekki ráð fyrir að það hafi mikil áhrif á þjóðfélagið. Eitt er víst að þá bitnar bullið frekar á fólkinu í kringum mig.

Segjum þetta gott í bili.

Gallaðir pennar!

2007-05-07T20:35:00.000Z

Hvernig stendur á því að sama hvað stjórnmálamenn eru lengi í bransanum, þá endurnýja þeir aldrei pennana sína nema rétt fyrir kosningar. Merkilegt líka að fylgjast með þeim í umræðunum hvernig þeir vita alltaf betur hvað hinir eru að meina hvað þeir segja heldur en þeir sjálfir, en þeir sjálfir segja yfirleitt sem minnst (af viti allavega). Já það hefur ekkert rosalega mikið farið framhjá manni að það eru að koma kosningar. Ég er búinn að ákveða mig hvað ég kýs á laugardaginn, Eirík Hauksson ekki spurning. Dettur ekki einu sinni í hug að hann komist ekki áfram!
Við höfum það ágætt hérna annars. Lilja er á fullu í samræmdum prófum og hefur gengið nokkuð vel, Arnar tekur síðan samræmt próf í stærðfræði. Ég er að verða búinn með þennan þriggja vikna kúrs sem er í gangi. Smá leiðindi í einum kennaranum gera það að verkum að ég þarf að taka eitt prófið aftur, held að hann hafi ekki skilið skriftina mína eða ikkað!
Erla Dagmar fór í ungbarnaeftirlit (youngbabybehindlook) í morgun og er í toppformi nema að hún er með eyrnabólgu og fékk eitthvað við því. Hún er að nálgast 9 kílóin og rauf 70cm múrinn að auki.
Biðjum að heilsa í bili.

Villimenn

2007-04-27T08:35:00.000Z

eða villikonur þarna í Mexíkó! Heyrði í fréttum í vikunni að þeir hefðu samþykkt lög, sem gilda að vísu bara í höfuðborginni hjá þeim, sem heimila konum/mæðrum að eyða fóstrum. Það er greinilega betra ástand þar en hér þar sem er stórvandamál að fá fóstrur til starfa.
Það var virkilega gaman að skreppa norður um síðustu helgi og hitta allt liðið í fermingarveislu. Held að allir hafi verið ánægðir með þennan viðburð. Nokkuð gaman að ná sjö af þessum átta börnum árgerð 2006 saman í einu. Leiðinlegt að Berglind Björk gat ekki verið með, en þessum sjö var hrúgað saman í sóffa og teknar myndir í gríð og erg.
Það var ekki síður ljúft að komast úr bænum eftir prófatörn sem lauk síðasta föstudag. Úrslitin eru að vísu ekki ráðin en vonandi hefst þetta allt saman. Er núna í þriggja vikna áfanga sem er töluvert mikil vinna. Hitti familíuna af og til!
Setti líka inn nokkrar myndir af þeirri stuttustu sem meðal annars voru teknar í sveitinni um daginn þegar Inga og krakkarnir voru í bústjórastörfum á Kjörseyri.
Kveðjur til þeirra sem vilja.

Stuttbuxur.......

2007-04-20T14:53:00.000Z

... er ekki alveg það fyrsta sem manni dettur í hug þegar komið er út í almanakssumarið sívinsæla. Hvað sem því líður er það þó formlega hafið. Var ljómandi sumarlegt að horfa út um glugga í gær, en töluvert svalt svona þegar maður var staddur fyrir utan sjálfur. Ekki hlýrra í dag.
Prófatörn lokið í bili, má alveg reikna með endurtöku í einhverju af þessu dóti. Dagsformið er alltaf jafn hörmulegt á prófdögunum sjálfum og hef ég farið fram á að prófin verði alltaf færð um einn dag í framtíðinni!
Við ætlum að streyma af stað norður á Kjörseyri á eftir. Kíkjum í fermingarveislu hjá Ingu Hrund frænku sem haldin verður á Gauksmýri á morgun. Verður án efa stórskemmtilegur hittingur líkt og ávalt þegar þetta lið kemur saman.
Hættur í bili.
Hafið það sem bezt og gleðilegt sumar.

Ekki páskar lengur!

2007-04-10T20:40:00.000Z

Jæja þá eru þessir páskar liðnir og gerðist það óvenju hratt eins og vanalega þegar maður hefur það gott. Við Arnar komum í bæinn áðan en þær mæðgur komu allar suður í gær. Allir höfðu, eins og áður kom fram, það ljómandi gott. Ég fór beint vestur í Fagradal á föstudaginn og Inga og Erla Dagmar komu svo þangað á laugardag. Þetta var smá keyrsla eins og fylgir en slapp allt fyrir horn.
Ég setti inn nokkrar myndir núna og bæti við einhverju síðar. Núna hvolfi ég mér í prófalestur fram yfir tuttugasta þannig að rólegra verðu hér heldur en vanalega á næstunni.
Hafið það sem best.

Páskar

2007-04-06T15:00:00.000Z

Já það held ég, bara komnir páskar og allt sem því fylgir. Alveg ljómandi veður víðast hvar um landið þannig að ekki skiptir miklu máli í hvaða átt maður fer. Ég ætla nú samt sem áður að skella mér vestur í Fagradal núna rétt bráðum. Þar er töluverður hellingur af fólki sem ég er nánast viss um að bíða spennt eftir komu minni! Síðan kíkja þær mæðgur Inga og Erla Dagmar þangað við tækifæri.
Ég bætti við nokkrum myndum inn í marz-möppuna hjá EDI. Ekki nóg með það heldur uppgötvaði ég nýjan hæfileika hjá mér um daginn sem eru landslagsmyndatökur. Fór með EDI út að labba í síðustu viku og náði þá gífurlega góðum myndum af helstu fjöllum hér í kring.
Segjum það í bili og óska ykkur gleðilegra páska.

.... far og tröll.......

2007-04-02T21:00:00.000Z

....... í Hafnarfirði þessa dagana, ekkert ál. Aumingja fólkið sem býr í faskeiði og getur bara haft allar tegundir af eggi ofaná brauð. Auminga fólkið þegar agningarseðillinn kemur í hús. Vona bara að þeir verði ekki hnepptir í ög. En úrslitin eru ráðin og ekki hægt að breyta því.
Það hefur ekki gefist tími til að skrifa neitt hér undanfarið þar sem töluvert hefur verið að gera í prófalestri og verkefnaskilum. Var í prófi í dag og öðru í síðustu viku og svo koma tvö eftir páska. Arnar og Lilja eru farin norður, Inga og Erla Dagmar fara líklega á miðvikudaginn og ég fer væntanlega úr bænum á föstudagskvöldið en hvert er ekki alveg ljóst enn.
Annars er bara flest við það sama held ég og man eiginlega ekki eftir neinu fleiru að sinni.
Bestu kveðjur.

Afmæli

2007-03-22T21:28:00.000Z

Hún Lilja Guðrún á afmæli í dag, já orðin sextán ára gömul stúlkan. Innilega til hamingju með þennan áfanga Lilja mín.
Við vorum í skírnar/útskriftar/afmælisveislu um síðustu helgi hjá Emilíu og fjölskyldu. Virkilega vel heppnað allt saman, bæði athöfn og veislan sjálf. Til hamingju með alla þessa áfanga þið öll. Ég laumaðist til að setja inn nokkrar myndir frá þessu öllu saman.
Segjum þetta gott í bili.

Sirkus

2007-03-16T21:38:00.000Z

Ég veit ekki alveg hvort leikhúsið hefur vinninginn í farsaleikjunum þessa dagana, Leikhúsið við Austurvöll eða Leikhúsið við Arnarhól. Áhugavert að fylgjast með gífurlegum fjölda aukaleikara sem þátt taka í þessum verkum, sem standa sig með afbrigðum illa í flestum tilfellum. Aðalleikarar eru þó ekki mikið sterkari og eiga það til að gleyma textanum og jafnvel einhverju mikilvægara!
Það heyrist ennþá klokk klokk klokk í bílnum hjá mér.
Við fórum í síðasta ungbarnasundstímann í gær og byrjum á næsta námskeiði strax eftir viku. Misstum af þremur tímum af átta vegna veikinda en fáum samt að halda áfram sem betur fer.
Ég setti inn nokkrar myndir áðan af Erlu Dagmar úr mars-safninu.
Bestu kveðjur í bili.

Greindur

2007-03-12T17:52:00.000Z

Ég er ekki viss en mig grunar að ég nái ekki að fullnýta nagladekkin mín í vetur. Talandi um nagladekk þá fór ég með bílinn á verkstæði á föstudaginn til að fá úr því skorið hvað ylli þessu pirrandi hljóði (klokk klokk klokk klokk og stundum hggg hggg hggg) sem ég hreyrði af og til í honum að framanverðu. Þeir tóku smá rúnt á honum, settu hann tvisvar upp á bílalyftu og hömuðust í honum í hálftíma en fundu ekkert að! Ég dó nú ekki ráðalaus og ákvað að fara bara með drusluna í skoðun og ná mér í grænann miða og fá um leið almennilega greiningu á þessu. Ég hef aldrei orðið vitni að annari eins hraðferð í gegnum skoðunarferlið og það eina sem sett var út á var léleg rúðuþurrka að aftan! Það hljómar fáránlega en ég var hálf svekktur að fá skoðun loksins þegar það tókst svona í fyrstu tilraun. Ég verð bara að keyra um og sætta mig við þetta hljóð af og til.
Erla Dagmar er búin að vera svoldið slöpp síðustu daga. Var á pensilíni út af eyrunum, fékk sennilega ofnæmi fyrir því og fékk þá mixtúru við ofnæminu sem gerði hana frekar slappa og auma. Á laugardagsnóttina fékk hún síðan gubbupest og eftir það hefur þetta legið niðurávið, eða þannig. Hún hefur ekki mikla matarlyst og er frekar lítil í sér. Við erum að fara í mat í Þorláksgeislan í kvöld og kannski fær hún matarlystina aftur og gúffar í sig lambalæri!
Arnar Ingi fór í morgun á mínar æskuslóðir, að Laugum nánar tiltekið, og verður þar þessa vikuna í ungmennabúðum. Vonandi verður jafn gaman hjá honum og það var þessi ár sem ég átti þarna.
Jæja hættur í bili og hafið það sem best.

Marz

2007-03-07T13:02:00.000Z

Vegna mikilla lækkana á matarverði undanfarið hef ég alveg gleymt mér í innkaupum og ekki mátt vera að því að skrifa neitt hérna á síðuna. Að vísu tóku þeir í Krónunni, sem er hérna hinumegin við götuna, þessa lækkanir full alvarlega. Þegar ég kíkti við hjá þeim daginn sem þeir lækkuðu þá hafði afgreiðslufólkið lækka um að minnsta kosti 7% og þjónustan um 14%. Annars eru þessar lækkanir svoldið spennandi eins og tebollurnar hérna í mötuneytinu bera vott um. Fyrir lækkun kostuðu þær 150kr en eftir lækkun 180kr. Þó ég sé búinn með töluvert marga áfanga í stærðfræði síðustu árin, næ ég bara ekki að reikna þetta svona út!
Erla Dagmar fór í átta mánaða uppherslu og smurning á mánudaginn. Kom bara vel út út þeirri skoðun og fékk viðeigandi sprautur. Hún heldu sinni kúrfu og er orðin 7,5 kg og 68cm. Pabbi hennar þyngist nú líka rosa vel, en hann er nú kominn langt út fyrir allar kúrfur í þessu. Held hann sé orðinn nærri 15 cm undir kjörhæð!
Liverpool komst í gær í átta liða úrslit í meistaradeildinni þrátt fyrir að tapa fyrir Barcelona. Eiður smári skoraði ágætt mark sem kom sér vel fyrir Umhyggju og skjólstæðinga þeirra.
Jæja ætla að hætta þessu bulli í bili.
Langar svona í lokin að óska frændum mínu til hamingju með afmælin sín. Alexander Rósant er eins árs í dag og Þórólfur Hugi á morgun.
Bestu kveðjur.

Stemming

2007-02-27T10:30:00.000Z

Það var ljómandi gaman, mikill og góður matur hjá veiðifélögum mínum á villibráðakvöldinu. Það var gífurlegt úrval góðra rétta sem á einvhern ótrúlegan hátt manni tókst að smakka á. Sumir voru nú reynda svo saddir þegar borðhaldi var lokið að þeir áttu í vandræðum með að sitja og enn meiri vandræðum með söng. Húsið var algjör snilld en helst hefði mátt setja út á staðsetningu á heitum potti sem sneri upp í norðanáttina og algjörlega laus við að sólin skini á hann. Ljómandi vel heppnað allt saman þrátt fyrir þetta smáatriði. Setti inn nokkrar myndir (lét duga svona fyrir miðnætti myndir)!
Hér heima er það að frétta að Erla Dagmar hefur verið heima núna í rúma viku. Við fórum með hana til læknis í gær og er hún með smá eyrnabólgu og fékk penisilín við því. Hún er nú samt nokkuð hress að öðru leiti, en henni leiðist ekkert að láta halda á sér. Lilja Guðrún er heima líka með pest sem er ekki skemmtilegt fyrir hana. Vonandi fer þetta að jafna sig allt saman.
Látum þetta nægja í bili.

Semsagt

2007-02-24T11:39:00.000Z

Margt er semsagt, sem sagt er, skrítið. Ég hef til dæmis aldrei hitt neinn sem kallar allt ömmu sína, sem betur fer þar sem það mundi hljóma afskaplega hálfvitalega.
Erla Dagmar er búin að vera svoldið veik þessa vikuna. Inga hefur verið með hana heima og ég reynt að kíkja heim strax eftir skóla. Hitin hjá henni fór nú aldrei langt yfir 39 stig en hún hefur verið svakalega lítil og aum. Hún er nú orðin hitalaus núna en er frekar slöpp. Ég er nú svoddan fyrirmyndarpabbi að ég er að stinga af borginni til að hitta félaga og vini í villibráðarkvöldi sem haldið er á þessum stað.
Ég setti inn nokkrar myndir áðan frá því um síðustu helgi.
Blessygguríbili.

Meira hviss

2007-02-20T20:29:00.000Z

Vá ég var rétt að enda við að skrifa síðustu færslu. Fer nú að hafa áhyggjur af þessu. Veldur mér ugg eða það sem verra er, af því allt líður svona hratt, örugg!
Hvað sem því líður þá var ljómandi gaman fyrir norðan um helgina. Þau skemmtu sér vel á þorrablótinu. Við Elvar skemmtum okkur ágætlega heima á meðan, með þær Emilíu og Erlu Dagmar. Elvar skemmti sér þó töluvert betur en ég þar sem hann var að kenna mér spil sem illkvitni nefnist. Já þið getið giskað á framhaldið.
Við veiðifélagarnir ásamt mökum verðum með villibráðarkvöld næstu helgi og leigjum heilt veiðihús (að sjálfsögðu) fyrir herlegheitin. Þetta verður án efa hin besta skemmtun, góð mæting og frábær aðstaða. Ég þori ekki að nefna staðsetninguna svo við fáum einhvern frið fyrir æstum aðdáendum.
Segjum þessu lokið að sinni.

Hviss - bang

2007-02-15T21:22:00.000Z

Vá hvað tíminn getur liðið hratt!!

Mér finnst örstutt síðan við komum heim frá Kanarý.
Fyrsti sónarinn er ljóslifandi í minningunni.
Núna er maður næpuhvítur, Kanarý óralangt í burtu og Erla Dagmar að verða átta mánaða.
Við vorum að koma heim úr ungbarnasundi áðan, það er hálfnað og við rétt nýbyrjuð. Það gengur alveg æðislega og EDI stendur sig mjög vel.
Þessi önn hjá mér er hálfnuð, styttist í próf og ég rétt að verða búinn að taka plastið utanaf námsbókunum.
Kosningar í vor og tíminn leið svo hratt að enginn náði að efna kosningaloforðin frá því síðast (greyin) og því er hægt að nota þau aftur núna.
Lilja og Arnar eru komin á megafaraáþorrablótaldurinn og mega því fara á þorrablót og Inga ætlar að því tilefni að bjóða þeim á þorrablót sem haldið verður í "Stærsta smábæ í heimi" eins og segir einhverstaðar. Þarna er að sjálfsögðu átti við Borðeyri ef einhver fáfróður les þetta.
Úff klukkan að verða tíu og ég á eftir að læra aðeins, vá hvað tímin líður hratt.
Heyrumst síðar

Klöppum!

2007-02-12T20:41:00.000Z

Klöppum fyrir manninum sem setti nýjar myndir inn á myndavefinn áðan. Klöppum fyrir manninum sem fór með blöðin út í Sorpu í dag. Klöppum fyrir manninum sem skilaði DVD myndunum sólarhring of seint. Klöppum fyrir manninum sem fór í sund fyrir kvöldmatinn. Klöppum fyrir manninum sem var í hroðalegu prófi í morgun. Síðast en ekki síst klöppum fyrir öllum þeim sem eiga afmæli í dag.
Svo einkennilega vill til að megnið af þessu á við mig. Ég setti inn nokkrar myndir áðan ykkur til skemmtunar og fróðleiks. Allt ljómandi að frétta annars þrátt fyrir einhvern lasleika hjá ýmsum á heimilinu. Sú stuttasta hefur sloppið hingað til sem er alveg ágætt.
Langar að óska Ísdísi frænku til hamingju með afmælið í dag. Hún og Skafti litli pabbi hennar kíktu reyndar í heimsókn í gær, voru í bæjarferð, og komu með sitt lítið af öðru hvoru með sér til hinna og þessa. Gaman að fá góða í heimsókn.
Ég er alveg búinn eftir þessa 200 metra sem ég tók á 20 mín. áðan svo ég ætla að hætta þessu bulli í bili.
Bestu kveðjur.

Böns af börnum

2007-02-05T22:41:00.000Z

Við skruppum í Vogalandið seinni partinn í dag að hitta ættingja og vini á efri hæðinni. Þar voru teknar nokkrar myndir af þeim Emilíu og Erlu Dagmar. Svo skemmtilega vildi til að á neðri hæðinni var annar í afmæli hjá Hönnu Björg og heill haugur af litlum frændum og frænkum. Að sjálfsögðu var notað tækifærið og þeim hrúgað í sóffann og myndað í gríð og erg. Þarna voru saman komin fimm af þeim átta barnabarnabörnum sem Inga amma eignaðist á síðasta ári.
Setti inn nokkrar myndir og má sjá þær hér.

Hmm allt hvítt!

2007-02-03T11:14:00.001Z

Hvaða rugl er þetta eiginlega, allt hvítt af snjó og það um miðjan Þorra! Skil þetta veður ekki lengur. Læðist að mér sá grunur að nóg verði af árekstrum í dag þar sem þetta kemur svona óvænt og á furðulegum tíma. Vonandi ná vegfarendur að átta sig fljótlega á því hvað þetta er og nái að haga akstri eftir aðstæðum.
Það fór nú ekki alveg eins og ég hafði vonast til í handboltanum í vikunni. Fyrst þetta ömurlega tap gegn Dönum og síðan gegn Rússunum. Það er bara eitt í stöðunni núna og það er að taka fráfarandi heimsmeistara og pakka þeim saman, ná sjöunda sætinu og komast þannig í umspil fyrir ólympíuleikanna. Hvað sem öllu líður þá eru þeir nú búnir að standa sig ljómandi vel strákarnir.
Loksins hafði ég það af að setja inn nokkrar myndir af Erlu Dagmar og er þetta svona sitt lítið af öðru hvoru frá nýliðnum janúar mánuði.
Ég er að fara á þorrablót burtfluttra Saurbæinga í kvöld sem verður örugglega lítið leiðinlegt. Kvíði reyndar svoldið fyrir morgundeginum! Inga ætlar að bjóða Lilju og Arnari á þorrablót fyrir norðan eftir hálfan mánuð. Verður gaman fyrir þau að komast í allan súrmatinn og fylgjast með fullorðnu fólki haga sér furðulega.
Læt þetta nægja í bili, verðum í bandi.

Hvað fyrir eitthvað!

2007-01-29T17:38:00.000Z

Eins og þeir segja þarna í Dansk. Já við spilum víst við Dani í átta liða úrslitum á HM. Hefði getað verið verra sjálfsagt, en ekkert er gefið í þessum efnum. Eftir góðan sigur á Slóvenum kom svona rólegheitaleikur gegn heimamönnum sem voru í þokkalegu stuði á móti okkur. Það verður spennandi að sjá hvernig fer á morgun.
Dr. Elvar og fjölskylda eru víst komin heim til Íslands (óstaðfest þegar þetta er skrifað) Gekk víst eitthvað erfiðlega frétti ég en eins og ég sagði er þetta ekki staðfestar fréttir. Mikið hefur gerst síðustu daga hjá Dr. Elvari þar sem hann kláraði prófin um daginn, útskrifaðis á föstudag varð þrítugur á sunnudag og flutti heim á mánudag. Þokkalegasta prógramm og ekki allir sem gætu leikið þetta eftir, sérstaklega ef þeir eru ekki í læknisfræði út í Danmörku :) Hvað um það, velkomin heim öllsömul og til hamingju með alla þessa áfanga.
Flest annað er nú nokkuð gott að frétta held ég, hér heima úr skóla og vinnu. Veðrið í ruglinu um þessar mundir, hitabylgja hér á þessum slóðum en göngufært yfir firði vestur á fjörðum vegna íss! Magnað alveg hreint.
Segjum það í bili, og áfram Ísland.

Stojazky nachkqualiensky!

2007-01-25T20:35:00.000Z

Þannig er það nú, ein niðursveifla til eða frá skiptir nú ekki öllu máli hjá strákunum. Ég geri ráð fyrir að planið hjá Alfreð hafi verið að tapa fyrir Pólverjum og Slóvenum,vinna Þjóðverjana síðan í síðasta leik og komast svoleiðis í átta liða úrslitin. Að því tilefni ætla ég að róa mig aðeins í tyggjóinu (sjúkk) og sleppa því að horfa á leikinn gegn Slóvenum, horfa síðan á þegar þeir valtra yfir Þjóðverjana á sunnudaginn. Gúdd plan er það ekki ;)
Annars stóðu þeir sig nokkuð vel í dag þrátt fyrir tapið, en Pólverjarnir eru nú ekki skemmtilegustu spilararnir á mótinu verð ég að segja. Einu atriðin sem hægt er að setja út á er kannski að þeir hefðu mátt skora fleiri mörk og fá færri mörk á sig.
Pása

Í boði Nicorette!

2007-01-24T22:04:00.000Z

Annar frábær sigur hjá strákunum í dag. Að þessu sinni fengu Túnis gaurarnir að kenna á baráttuvilja hjá vel stemmdum leikmönnum, þ.e.a.s. í seinni hálfleik. Fyrri hálfleikurinn bar flest einkenni Úkraínuleiksins en meiri Frakka stíll í þeim síðari. Líkt og síðast fór slatti af tyggjói hjá mér meðan á leik stóð og er ég alveg kominn með það á hreint að eitt tyggjó á fimm mín fresti gerir gæfumuninn! Þetta gífurlegabrúk togleðurs hjá mér hefur sínar slæmu hliðar og harðsperrur í kjálkum ásamt lausum fyllingum eru meðal þeirra.
Við höfum það annars ágætt hér á Ásbrautinni, Inga byrjuð að vinna á fullu og Erla Dagmar hjá dagmömmunni. Arnar og Lilja að sjálfsögðu á kafi í skólanum ásamt höfundi og gengur það bara ljómandi. Lilja að klára tíunda bekkinn í vor og samræmd stemming hjá henni. Hellingur af einhverju sem ég botna ekkert í á námsskránni hjá mér eins og vanalega.
Læt þetta duga í bili og vonandi get ég skrifað skemmtilegar línur hérna eftir leikinn gegn Pólverjum á morgun.
Bestu kveðjur.

Tyggjóbruðl

2007-01-22T23:01:00.000Z

Úff það fór eitt bréf af nikótíntyggjói áðan þegar "strákarnir okkar" sýndu allar sínar bestu hliðar í leiknum gegn Frökkum. Tóku þá í netta kennslustund og unnu verðskuldaðan sigur. Eins og í flestum öðrum leikjum þá beið ég með öndina í hálsinum (sem var frekar óþægilegt) eftir slæma kaflanum, en sem betur fer þá slepptu þeir honum að þessu sinni og ég er ekki frá því að það hafi komið Frökkunum jafn mikið á óvart og mér. Til hamingju með þetta strákar og það verður gaman að fylgjast með ykkur áfram, helst sem lengst.

Ungbarnasund

2007-01-18T22:20:00.000Z

Gaman að segja frá því að við fórum með Erlu Dagmar í sund, komum heim um hálf níu. Vorum hjá henni Sóley niður á Hrafnistu. Stórgóð aðstaða og Sóley frábær. EDI var reyndar svoldið óörugg þarna, fannst baðkarið í stærra lagi og full margir ofaní í einu. Sveinn Mikael frændi hennar var nú með og var að sýna réttu aðfarirnar, en það dugði ekki til og Inga var bara með hana til hliðar. Hún var nú líka orðin ansi þreytt og svöng, enda datt hún útaf þegar heim var komið. Annars er hún alltaf jafn hress og kát, komin með tvær flottar tennur í neðri góm og verða sumir meira varir við það en aðrir.
Inga er byrjuð að vinna, var í aðlögun þessa vikuna eins og Erla Dagmar hjá dagmömmunni. Það hefur gengið ágætlega nema að hún hefur ekki viljað sofa nóg, bara þróska og stælar (sko í EDI).
Skólinn er kominn á fullt eftir heljarinnar jólafrí. Ég náði að bjarga þessum prófum fyrir horn og er það mikill léttir.
Ég skal reyna að taka mig á í myndainnsetningu fljótlega.
Annars; hafið það sem best.

Bæ böss!

2007-01-10T23:37:00.000Z

Hef gert nokkrar misheppnaðar tilraunir með að taka strætó upp í skóla og í flest skiptin hef ég mætt of seint, krókloppinn og skapið ekki alveg það besta. Það er stórsniðugt að fara inn á heimasíðu þessa ágæta fyrirtækis þar sem maður einfaldlega slær inn upphafs og endastöð á þeirri leið sem fara á og eins og fyrir einhverja galdra kemur ákaflega einföld uppstilling á því hvernig fara á að þessu. "gengnir eru u.þ.b. 150............. strætó nr (hitt og þetta) stoppa og bíða í 1 mín og síðan taka þennan strætó" VIRKAR EKKI. Hef yfirleitt horft á stórar ljótar auglýsingar á strætónum sem ég "á að bíða eftir" hverfa í reykmekki út af stoppistöðinni þegar dollan sem ég er í rennir ljúflega upp að henni. Núna síðast var -7 stig á stigatöflunni og biðin var ekki nema 25 mín.
Ok hættur að tala um þetta.
Blessaðir fjölmiðlarnir náðu að eyðileggja snilldar plan hjá mér í vikunni. Hafði hugsað mér að gefa Kársnesskóla frímerkjasafnið mitt og fá í staðin þrefalt gler í íbúðina frá Kópavogsbæ. Verð að bíða með þessa áætlun þar til öldur lægir í óðamálum, nei ég meina lóðamálum í bænum. Alltaf verið að bögga hann Gunna Bigga Bæjó!
Blessykkuríbili

Jólafríið sko

2007-01-06T13:45:00.000Z

... er loksins byrjað hjá mér, núna í hádeginu! Eftir nokkuð langt upplestrarfrí yfir hátíðirnar og tvö próf núna á nýju ári gefst loks tími til að slaka á og njóta samvista með fjölskyldu og vinum fram að skóla. Þetta ætti að gefa u.þ.b. 40 klst. sem gerir það að verkum að ég ætla ekki að eyða meiri tíma í bullið að sinni.
Góður matur og félagsskapur í kvöld, kveðja jólin og horfa á eld.
Hafið það sem best.

Áramótin

2007-01-03T16:41:00.000Z

eru liðin, voru með svipuðu sniði og þau rúmlega tuttugu ár (að mig minnir) sem ég hef teki þátt í þessum stórviðburði! Við stórfjölskyldan úr Kópavoginum (þar sem er svo gott að búa) vorum orðin frekar þreytt á stórborginni og farin að sakna sveitanna okkar þannig að ákveðið var að skreppa smá rúnt. Við fórum á laugardagskvöldið norður á Kjörseyri og dvöldum í góðu yfirlæti fram á nýtt ár, en pakkað var saman snemma á nýársdag og brunað vestur í Fagradal. Náðum ekki að vekja alla þar en einhverja þó. Héldum síðan suður um kvöldið. Þetta var nokkuð sprettileg ferð eins og skáldið sagði, en vel þess virði og var ljúft að heimsækja bæði bú.
Nú er alvaran tekin við og nóg að gera eins og vanalega. Ég var í prófi í morgun, það fyrra af tveimur sem tekin verða í þessari lotu. Gekk bærilega og nokkuð vongóður um betri árangur en í fyrra skiptið! Það síðara verður síðan daginn fyrir fjórtándann.
Það er annars flest allt gott að frétta held ég bara, Erla Dagmar dafnar vel og verður alltaf frekari og fyrirhafnarmeiri. Hún verður víst að byrja hjá dagmömmunni í mánuðinum og ekki laust við að lítil tilhlökkun sé fyrir því hjá öðrum fjölskyldumeðlimum, veit ekki með hana sjálfa!
Ætli þetta sé ekki gott í bili og sendi nýjárskveðjur til þeirra sem vilja fá svoleiðis. Þetta eru 58 kveðjur sem ég sendi, þið takið við þeim ef þið viljið.
(Gleðilegt ár og takk fyrir það liðna) x 58
Koma vonandi myndir inn við fyrsta tækifæri.
Bless í bili

Jóladagur

2006-12-25T11:56:00.000Z

Gleðileg jól allir saman.

Upp er runninn jóladagur hvítur og fagur. Já það kom smá jólasnjór í nótt öllum að óvörum og er það vel. Við áttum virkilega ánægjulega kvöldstund í gærkvöldi með góðum mat og mörgum pökkum. Allir virikilega sáttir og ánægðir með sitt og Erla Dagmar yfir sig hrifin af öllum jólapappírnum og böndunum sem fylgdu!
Setti inn nokkrar myndir af herlegheitunum og eru þær aðgengilegar hér.
Þökkum kærlega fyrir okkur og endilega reynið að hafa það gott.

2006-12-24T14:53:00.000Z

GLEÐILEG JÓL

Kæru ættingjar og vinir nær og fjær, við óskum ykkur gleðilegra jóla og farsæls nýs árs. Megi allt gott fylgja ykkur um ókomna tíð. Kveðja frá okkur á Ásbrautinni,

Ingimar, Inga Hrönn, Lilja Guðrún, Arnar Ingi og Erla Dagmar.

Ha ha ha

2006-12-17T23:17:00.000Z

Ung dama í svaka stuði.

Það var heljarfjör og mikið skemmtilegt í fyrirjólaboði Kjörseyrarfjölskyldunnar á laugardaginn. Að þessu sinni vorum við heima hjá stelpunum í Breiðholtinu sem tóku virkilega vel á móti mannskapnum. Maturinn var mjög góður og nóg af honum. Þessi veisluhöld minnkuðu ekki álagið á buxnastrenginn, peysur eða boli sem var víst alveg nóg fyrir. Já ég hef nefnilega fengið gífurlegann bjúg að framanverðu núna í haust sem ég næ ekki að losna við! Myndir af hittingnum er komnar inn ásamt viðbót við Erlu Dagmars myndir.
Jólasnjórinn er mættur en samkvæmt spá þá gæti hann forðað sér fyrir jól aftur. Spennandi.
Þangað til næst, hafið það sem best.

Myndir segiru...

2006-12-10T22:42:00.000Z

Borið hefur á því undanfarið að einhverjir hafa, ég vil ekki segja kvartað, en gert athugasemdir við hvað lítið hefur komið inn af myndum á myndasíðuna síðustu vikur. Þrátt fyrir gífurlegt álag þá sá ég mér fært að verða við þessum óformlegu beiðnum og setti inn töluvert af myndum núna áðan. Þetta er svona sitt lítið af öðru hvoru og vona ég að þið njótið þeirra líkt og ég geri.
Þar sem óhemju stutt er liðið frá síðasta ritlingi hérna þá hef ég hugsað mér að hafa þetta ekki lengra að sinni.
Munið eftir jólastressinu, bless bless.

ANNA!

2006-12-08T23:47:00.000Z

Sökum anna hefur mér gengið erfiðlega að troða inn texta hér undanfarið sem eitthvert ykkar hefði mögulega gaman af að lesa. Það verður lítil breyting þar á næstu daga þar sem rólegheit í námi er eitthvað sem ekki er boðið uppá þessa dagana. Fljótlega eftir að þessu líkur eru jólin og síðan tekur við undirbúningur undir endurtökupróf! Já ég var ekki nógu ánægður með árangurinn í prófunum um daginn þannig að ég ákvað að reyna við eitthvað af þeim aftur.

Héðan er annars allt ágætt að frétta. Erla Dagmar alltaf kát og hress, lætur hafa svoldið fyrir sér og er þokkalega félagslynd viriðst vera því að vera ein að dunda er ekki hennar sterka hlið. Inga er búin að finna dagmömmu sem hún verður hjá eftir áramót, upp í Hraunbæ! Það er nánast hérna við hliðina þannig það er frábært bara.

Segjum þetta í bili og hafið það sem best.

Úgg

2006-11-27T20:13:00.000Z

Erla Dagmar situr í stólnum hjá Ingu langömmu. Við kíktum í heimsókn til hennar í gær og dvöldum í góðu yfirlæti hjá henni í dágóða stund, nóg af kökum og kruðeríi eins og vanalega. Kíktum á föstudagskvöldið í mat hjá Brynju og co upp í Mosó og fengum alveg öndvegis máltíð og með því.
Afmælisfaraldur í gangi um þessar mundir. Tengdamamma á ammæli í dag síðan eiga Victor Sindri, Ragna og Katrín öll ammæli á miðvikudaginn. Sú síðast nefnda svindlaði reyndar og hélt upp á sitt fyrir rúmri viku með pomp og prakt og var mikið húllumhæ, enda alveg forgömul stelpan! Til hamingju með afmælin öll sömul.
Mér datt í hug einn stórsniðugur málsháttur í morgun svona af því að það styttist nú í páskana!
Læt þetta nægja í bili og hafið það sem best.

Neutral

2006-11-23T22:45:00.000Z

Jebb ég er búinn að setja í hlutlausa gírinn í toppstykkinu og verð þannig fram á mánudaginn trúi ég. (Já enga svoleiðis brandara takk fyrir). Hvað sem því líður þá er prófatörnin búin og við tekur þriggja vikna kúrs sem byrjar á mánudaginn.
Við fórum í afmælisparty hjá Katrínu mágkonu og Jónu vinkonu hennar á laugardagskvöldið. Var í einhverjum sal nálægt Nauthólsvíkinni og var virkilega vel heppnað. Margt fólk og miklar veigar. Við vorum nokkuð heppin að vera á bíl því illa gekk að fá leigubíla vegna veðurs og færðar þegar á nóttina leið. Held að allir hafi þó komist heilir heim fyrir rest.
Erla Dagmar fór í 5 mánaða uppherslu og bleijuskipti í dag. Nei ekki alveg en allavega í skoðun, mælingu og sprautu. Hún fer ekki millimeter útfyrir kúrfuna og vigtaðist slétt 6kg. Lengdarmæling gekk frekar erfiðlega en með ákveðinni námundun mældist hún ca 61 cm. Þrælmóðgaðist þegar hún var stungin í lærið en var fljót að jafna sig. Veður og færð hefur ekki verið upp á það besta til að rúnta með barnavagn og hafa þær mæðgur því haldið sig að mestu heimavið síðustu daga.
Svona að lokum þá setti ég inn nokkrar myndir áðan.
Bestu kveðjur.

Afsakið hlé!

2006-11-17T23:11:00.000Z

Ég biðst velvirðingar á þessu hléi sem verður núna á þeirri bull-pásu sem í gangi var. Þetta má að sjálfsögðu rekja til tæknilegra mistaka sem áttu sér stað hjá stjórnanda síðunnar. Þetta kemur ekki fyrir aftur, ég endurtek ekki.......
Annars er allt ágætt að frétta nema þá helst að frostið rífur í og frís í æðum blóð, eins og skáldið skrifaði forðum. Prófin hálfnuð hjá mér eða réttara sagt þá er ég búinn með helminginn af prófunum sem ég tek að sinni. Helmingurinn af þeim sem eru búin gekk ágætlega, hinn ekki. Seinni helmingurinn af öllu er eftir og er fyrri helmingurinn af seinni helmingnum á mánudaginn en seinni helmingurinn af seinni helmingnum á fimmtudaginn.
Erla Dagmar er alltaf jafn hress. Vex og dafnar með hverjum deginum sem líður. Hún er víst óttaleg dekurrófa og sá sem þetta skrifar er víst ekki sá sem dekrar minnst við hana. Hef heyrt að maður eigi ekki alltaf að hlaupa til þegar heyrist í henni, er að vinna í þessu! Nafna hennar Auðbjörg Erla er í heimsókn núna þegar þetta er skrifað og það bara í annað sinn sem tvær Erlur eru í íbúðinni í einu, verða reyndar þrjár í fyrramálið frétti ég áðan. Setti inn smá spjallvídeó með Erlu Dagmar.
Læt þetta nægja í bili en get ómögulega lofað að fleiri tæknileg mistök geti ekki átt sér stað á næstunni.
Hafið það sem best.

Ekkert

2006-11-12T23:11:00.000Z

Héðan er ekkert að frétta merkilegt nema gott eitt. Ég kem nú til með að verða eitthvað latur við að rita línur hér næstu vikurnar þar sem prófin eru að byrja hjá mér og svo er nóg að gera bara yfirleitt. Ég skal hlífa ykkur við miklu bulli að þessu sinni.

Setti inn slatta af myndum úr Danmerkurferð þeirra mæðgna eins og einhverjir hafa tekið eftir.

Læt þetta nægja í bili.

Brahade.

Heim

2006-11-07T20:25:00.000Z

Já stelpurnar mínar eru komnar heim. Náði í þær út á flugvöll í dag og það var einstaklega ánægjulegt að sjá þær rölta í gegnum hliðið. Þær eru nú báðar alveg dauðþreyttar og sú styttri steinsefur alveg búin á því. Ferðin gekk alveg svakalega vel og voru þær báðar ánægðar með hana. Gaman að skoða myndir af þeim frænkum og vonandi koma nokkrar inn fljótlega. Harpa er búin að setja inn slatta af myndum á síðuna hennar Emilíu og eru þar margar skemmtilegar.

Læt þetta nægja í bili.

Badehra

Haaaa!

2006-11-06T15:22:00.000Z

Ég hef verið gabbaður, er kominn með eyrnabólgu. Var búinn að heyra að lítil börn væru í áhættuhóp með að fá í eyrun en ekki nýbakaðir feður. Kom aldeilis aftan að mér þarna!

Svei mér þá ef daginn er ekki farið að lengja aftur. Síðustu dagar hafa allavega verið óvenju lengi að líða. Þær mæðgur eru nú að koma heim á morgun og verður afar ánægjulegt að fá þær aftur heim á Frón. Spjallaði erlendis í gær og þar voru allir sáttir og sælir var svona afslöppunardagur í gær, þ.e.a.s. ekkert verslað (að ráði). Átti að nota daginn í dag til að klára það sem eftir var (af kortum).

Gott í bili.

Hadebra.

Samkvæmt áætlun!

2006-11-04T20:14:00.000Z

Ég talaði við Ingu áðan í síma og eftir því sem mér skildist þá gengur þetta allt samkvæmt áætlun. Þorðum ekki að tala frjálslega því auðvitað gæti síminn verið hleraður. Eins og ég sagði þá gengur áætlunin vel og virðast frændur okkar þar ytra vera alveg grunlausir gagnvart uppkaupum þeirra systra á stórmörkuðum í Odense. Annað er líka ljómandi þarna hjá þeim og hafa allir það gott.
Mig langar að óska þeim Ottó og Lindu innilega til hamingju með hann Svein Mikael sem skírður var í dag. Fallegt nafn sem hæfir fallegum dreng.
Læt þetta nægja í bili.
Hadebra

Odense

2006-11-02T23:00:00.001Z

Var að tala við þreytta ferðalanga áðan. Þær mæðgur (allar) eru komnar til Odense heilu og höldnu en þreyttar eftir langt og strangt ferðalag. Inga var með hana hangandi framan á sér megnið af leiðinni og eru þær orðnar þreyttar á hvor annari núna held ég. Annars var Erla Dagmar víst ósköp ljúf alla leiðina. Við fengum lánaðan burðarpoka hjá Berglindi Björk og virkar hann alveg frábærlega. Það voru fagnaðarfundir hjá þeim systrum/frænkum/frænda við komuna, en hef trú á að flestir ætli í bælið og hvíla sig.

Ég setti inn nokkrar myndir (loksins) áðan og vona að það komi slatti erlendis frá fljótlega.

Bless í bili.

Hægðir!

2006-10-31T12:42:00.000Z

Þetta var sko þema hjá bílstjórum í morgun! Keyrðu allir í hægðum sínum, héldu að það væri hálka af því að það var svo kalt! Var svoldið pirrandi að horfa á gangandi vegfarendur taka framúr. Veðrið er samt ljómandi fallegt, ekkert út á það að setja. Kemst ég nú samt ekki í jólaskap eins og sumir.
Ótrúlegt hvað frystikistur verða litlar á haustin. Okkar er það allavega eftir sláturstíðir nyrðra og vestra. Nú verður etið kjet í öll mál næstu vikurnar, ýmsum til mikillar gleði.
Það styttist í að Inga og Erla Dagmar fari til Danmerkur ásamt Rögnu og Dagmar. (veit ekki alveg hvernig hún fór að því að plata Rögnu með sér erlendis)! Þær fara skreppa saman og leggja af stað á fimmtudaginn. Það verður örugglega rosa gaman hjá þeim að hitta Hörpu, Elvar og Emilíu. Verður gaman að sjá þær frænkur saman og spurning hvort þeim semur jafn vel og þær eru skyldar.
Prófin að byrja eftir hálfan mánuð. Ætli maður reyni ekki að nota tíman meðan þær eru erlendis og gleyma sér námsbókalestri. Það er allavega góð hugmynd, en hvort mér tekst að láta hana verða að veruleika er annað mál.
Kveðjur að sinni.

Afgangar

2006-10-25T21:28:00.000Z

Það er mesta furða hvað gengur á birgðirnar sem komu heim úr skírnarveislunni. Eitthvað hefur endað í hölduplastpokum sem dottið hafa niður rennu hér fyrir utan dyrnar.
Inga og Erla Dagmar fóru norður á Kjörseyri í morgun. Tóku rútuna ásamt eldri hjónum, ekki nema 36 sæti laus af þessum 40 sem voru þarna! Þær ætla að vera fram á sunnudag og taka þátt í hausstörfunum í sveitinni. Við skólakrakkarnir björgum okkur á meða hér syðra, að vísu eru Lilja og Arnar í vetrarfríi fimmtudag og föstudag. Þau þurfa að vísu að sjá um blaðburð þannig að það er ekki alveg frí hjá þeim.
Ég var að fylgjast með heljar miklum og löngum fréttum af flugslysi......... sem varð ekki í dag. Viðtöl við lögreglumenn, sýslumenn, slökkviliðsmenn, björgunarsveitamenn og marga fleiri sem stóðu sig óaðfinnanlega við björgunarstörf. Læknar stóðu sig vonum framar og stigu ekki feilspor í því ferli sem svona alvarleg flugslys setja af stað. Allt endaði þetta vel og meira að segja þurfti ekki að veita farþegunum áfallahjálp!
Segjum þetta gott í bili og hafið það sem best.

Erla Dagmar Ingimarsdóttir

2006-10-22T17:59:00.000Z

Já gott fólk það er búið að skíra dömuna og eins og gefið er í skyn í fyrirsögninni þá heitir stúlkan í höfuðið á ömmunum sínum. Athöfnin fór fram í Kópavogskirkju og veisla í safnaðarheimilinu. Okkar nánustu mættu flest öll, en það dugði skammt til að torga því gífurlega magni af kökum og kruðeríi sem á boðstólum var! Næsta vika fer í að henda afgöngum svona smátt og smátt eftir því sem maður fær ógeð á. Þetta fór allt vel fram og var vel heppnað á allan hátt. Við erum öll mjög lukkuleg og held að Erlu Dagmar lítist alveg ljómandi vel á nafnið. Hún var að minnsta kosta afskaplega góð og dugleg í dag þar sem hún svingaði á milli manna og var mynduð í bak og fyrir. Nokkrar myndir eru farnar inn á myndasíðuna. Takk fyrir í dag.

Birrrrrrrrr

2006-10-19T23:00:00.000Z

Kalt. Þurfti að skafa í gærmorgun, ferlegt. Ekki í morgun, samt ferlegt! Þessi utanáliggjandi einangrun sem ég hef komið mér upp er ekki að virka nógu vel, held ég reyni að losa mig við hana eins fljótt og ég get. Helvíti þungt líka!
Beyglað. Þurfti að fylla út tjónaskýrslu. Gaur sem bakkaði á bílinn hjá mér þar sem ég var staddur. Hefði betur verið staddur annars staðar. Ég var mjög heppinn að stórslasast ekki. Var sem betur fer inn í heildsölunni og bílarnir út á plani.
Erlendis. Inga og ungfrú NoName ætla að skella sér til Danmerkur á næstunni. Verður rosalega gaman hjá þeim að hitta gengið þar ytra.
Vegabréf. Ekki eitthvað sem er einfalt að nálgast. Fuuuulllll miklar tengingar á milli gagnagrunna til að hægt sé að gera þessa hluti á vitrænan hátt.
Kveðjur. Eitthvað sem ekkert mál er að redda.
Gjöriðisvovel

Hóst hóst........

2006-10-17T20:51:00.000Z

Afsakið, þetta varð bara að koma!
Engin ósköp að frétta held ég. Ungfrú NoName (eins og sumir eru farnir að kalla hana) er orðin yfir sig spennt að fá nafn. Aðrir eru frekar slakir út af þessu! Undirbúningur gengur ljómandi og ég er langt kominn með að baka. Hún er að prófa að sofa í rúmmmminu sínu í fyrsta sinn í nótt, var sko að fá nýja dýnu. Annars heldur hún bara sínu striki og dafnar vel.

Setti inn nokkrar myndir um helgina.
Bless í bili.

Stuna...

2006-10-12T12:38:00.000Z

Já ég viðurkenni það að frá mér hefur varla heyrst hósti né stuna í nokkurn tíma. Hugmyndin er að reyna bæta úr því og setja inn nokkrar línur á þessum sólríka degi.
Svo maður haldi áfram þar sem frá var horfið síðast þá var ljómandi gaman í seinni leitum fyrir vestan þó svo að minningin sé svoldið í móðu. Það komu ekki margar rollur af fjalli, en úr því var bætt með að smala flest önnur svæði í nágrenninu og fylla húsin. Um síðustu helgi fóru Inga, Arnar Ingi og sú stutta norður á Kjörseyri í smá rollurag, en við Lilja vorum í bænum. Þótt ótrúlegt sé þá gæti allt eins farið svo að við verðum bara öll í bænum þessa helgina!
Búið að vera nokkuð mikið um að vera í fótboltanum síðustu daga. Sumt er eftirminnilegra en annað í þeim efnum. Strákarnir stóðu sig vonum framar gegn Svíum í gærkvöldi eftir ekki alveg eins góða ferð til Lettlands um helgina. Hápunktur umferðarinnar er þó tvímælalaust seinna markið sem Englendingar fengu á sig gegn Króötum.
Stelpan er alltaf jafn fallega og frísk. Þið fáið engar myndir að þessu sinni, bæti úr því við fyrsta tækifæri.
Bestu kveðjur.

Örvar!

2006-10-05T23:06:00.000Z

Mig skortir eitthvað þessa dagana sem örvar sköpunargleði- og ritfærnitaugarnar hjá mér. Þessi færsla verður því í styttra lagi vegna örvunarskorts.
Flest gott að frétta eins og að það styttist í að sú stutta verði ekki lengur sú stutta þar sem sú stutta lengist og eins þar sem styttist í skírn sem verður þann 22. n.k. Neibb það er ekki búið að ákveða nafnið, en það kemur allt saman. Setti inn nokkrar myndir af henni og einni þokukendar myndir úr seinni leitum í Fagradal.
Au revoir!

Og Óskarinn fær............

2006-09-28T22:30:00.000Z

..... Mr. Ragnarsson fyrir bestan leik í dramahlutverki! JEIJ
Horfði á svoldið merkilegan fréttatíma á RÚV núna í kvöld. Samansafn af hálfskrýtnu og mismerkilegu sjónvarpsefni ef ég má orða það svo. Myndir af myrkri var sennilega það sérstakasta sem að vísu náðist ekkert sérlega vel á mynd þótt einkennilegt megi virðast. Vatn að renna í árfarvegi var einnig svoldið áhugavert, nokkuð sem fólk sér nú töluvert af hérlendis, þ.e.a.s. ef fólk hefur nennt að ferðast um landið án þess að Landsvirkjun hafi þurft að leggja vegi fyrir það fyrst. Nú svo má ekki gleyma honum Árna Eftirlæti, eins og hann er kallaður í Seðlabankanum, sem hafði ekki taugar eða samvisku í að hundsa þann gífurlega þrýsting sem settur var á hann með að fara í framboð. Maður vorkennir Sjálfstæðismönnum á Suðurlandi að þurfa að velja úr þvílíkum hópi úrvalsfólks sem kost gefur á sér í þetta vanþakkláta starf.
Ég er alveg hrikalega myrkfælinn og ákvað því að forða mér af höfuðborgarsvæðinu. Skildi fjölskylduna eftir og er kominn vestur í Fagradal með smá viðkomu á Kjörseyri síðustu nótt. Hér brestur á með seinni leit á laugardag og svo mun einnig vera fyrir norðan. Inga og krakkarnir renna þangað á morgun.
Sú stutta lengist og þyngist. Fór í þriggja mánaða skoðun í gær og fékk sprautu við öllu mögulegu. Stóð sig svaka vel og heilsast fínt. Hún er að nálgast 10kg......... tja allavega hálfnuð og alveg að verða 60cm.
Læt þetta nægja að sinni og hafið það sem best.

Myndband

2006-09-23T20:39:00.000Z

Myndbandið sem hér var hægt að skoða er hægt að nálgast inn á myndasíðunni undir My videos.
Maður er svona að jafna sig á harðsperrunum eftir fyrstu leit og getur því farið að hlakka til þeirrar næstu! Annars smalaðist svo svakalega vel í þokunni um daginn að það er alveg óvíst hvort það þurfi nokkuð að fara aftur. Það var alveg svakalegt fjör þessa leitarhelgi og nóg af mannskap til að þvælast fyrir fénu.
Héðan af Ásbrautinni er gott að frétta. Sú stutta stendur sig vel að vanda enda styttist í þriggja mánaða afmælið hennar, þó hún sé eiginlega eins og hálfs! Samt ekki eins og hálfs, eða þannig.
Setti inn nokkrar myndir af henni í dag og nokkrar frá því á réttarhelginni.
Læt þetta nægja í bili og hafið það sem best.

Léttir & reitir

2006-09-18T09:15:00.000Z

Eða var það réttir og leitir! Hvað sem því líður þá voru réttir víða um land þessa helgina og þá safnast saman ótrúlegur mannfjöldi til að taka þátt í og aðstoða frændfólk, vini og kunningja við að ná heim búfénaði. Þessi mynd náðist fyrir einhverja tilviljun af okkur bræðrunum heim í Fagradal eftir að hafa rekið rollur fram og til baka alla helgina. Leitir gengu ljómandi vel þrátt fyrir þokuslæðing sem hékk yfir hluta laugardagsins. Fjárdráttur gekk nokkuð vel og mest allt ókunnugt komst á sínar heimaslóðir held ég bara. Kunnugt fé hefur það ágætt heim í haga. Fjölmennt var að vanda í Fagradal og held ég að 36 manns hafi snætt eftirleitarlærin á laugardeginum. Að sjálfsögðu var síðan sungið ótæpilega og drukkið af hjartans lyst fram eftir nóttu.
Fjölskyldan mín var á sama tíma á Kjörseyri þar sem álíka mikið var um að vera. Þar var smalað á föstudeginum og gekk bara ljómandi. Kannski sú stutta geti kíkt á rollurnar á næsta ári og horft á systkyni sín hlaupa um og reka rollur. Að þessu sinni svaf hún þetta mest allt af sér og meira að segja fjörið á föstudagskvöldinu.
Ætli þetta dugi ekki að sinni og reikna má með nokkrum myndum í vikunni.
Bestu kveðjur.

Mokveiði....

2006-09-13T21:24:00.000Z

.. var ekkert að angra okkur í veiðitúrnum á mánudaginn! Veðrið á sunnudeginum gaf heldur ekki tilefni til neinna veiðitilburða af minni hálfu allavega. Sem betur fer er maður það vel upp alinn í ungmennafélagshreyfingunni að málið var aðallega að vera með, ekkert endilega að veiða, sem var raunin. Að vísu komu 4 laxar á land, en ég var alveg blásaklaus af þeim tilþrifum.
Hittingar síðasta föstudag voru alveg hreint stórfínir. Afmælið hjá Birtu Rún var ljómandi skemmtilegt og nóg af kökum og tertum. Þaðan héldum við síðan í matarboð (já einmitt, gúdd plan) til Þórólfs og Katrínar. Hittum þar fyrir Kalla og fjölsk ásamt Sigga, Ines og Aaroni. Þetta var að sjálfsögðu svaka gaman og frábær matur. Sú stutta var handfjötluð af töluvert mörgum þennan daginn, enda var hún orðin ansi þreytt þegar heim var komið um miðnættið.
Morguninn eftir var haldið af stað á Kjörseyri og náðum við beint í hádegismatinn. Slökun þar fram á sunnudaginn og haldið af stað suður seinni part dags. Ég var skilinn eftir í Borgarnesi þar sem Ingþór og Þórólfur pikkuðu mig upp á leið upp í Hítará eins og áður hefur komið fram.
Næsta helgi verður nú ekkert sérlega róleg trúi ég. Ætli við streymum ekki af stað annað kvöld í Hrútafjörðinn. Ég held síðan sem leið liggur vestur í Fagradal einhverntíma í framhaldinu. Leitir verða á föstudeginum fyrir norðan en á laugardag fyrir vestan. Gera má ráð fyrir óhemju subbulegri ferð fram á fjall heima eftir rigningar undanfarið, spurning hversu langt verður hægt að þvælast á Zetor. Annars verður sennilega að fara tvær ferðir vegna fjöldans sem tilkynnt hefur komu sína í Fagradal þetta árið. Heyrði í Torfa í gær og hann var að nálgast 40 manns í talningunni þegar ég gafst upp á að hlusta! Verður nokkuð þröngt á kindagreyjunum þegar dregið verður í sundur.
Vá ég er búinn að skrifa alltof mikið. Hætti þessu í bili. Setti inn nokkrar myndir í viðbót.
Bestu kveðjur til ykkar allra og heyrumst eftir leitir.

Gróðurhúsaáhrifin!

2006-09-08T09:47:00.000Z

Þá er það staðfest og vísindalega sannað hve gróðurhúsaáhrifin eru gífurleg. Að sama skapi eru þessi áhrif ekki öll jafn alslæm eins og gjarnan birtist í umræðunni. Þetta sést glöggt á myndinni hér að ofan.
Annars er það að frétta hjá okkur að nóg er um að vera næstu daga. Við förum í barnaafmæli upp í Mosó seinnipartinn í dag, Birta Rún verður tveggja ára og bara til hamingju með það. Í bakaleiðinni verður stoppað í Grafarholtinu hjá Þórólfi&Katrínu í matarboði fyrir okkur bræðurna og fjölskyldur. Tilefnið er Íslandsreisa Sigga bró og fjölsk. Því miður næst ekki að safna nema 80% af okkur bræðrum í þennan kvöldverð þar sem Torfi hefur ekki tök á að vera með. Á morgun förum við síðan norður á Kjörseyri og fáum kannski að reka nokkrar rollur þar. Á sunnudaginn verð ég síðan eftir einhversstaðar út á Mýrum þar sem við félagarnir erum að fara að veiða í Hítará á mánudag. Helst ætluðum við að bleyta girni einhversstaðar á sunnudeginum ef möguleiki er á.
Sú stutta er alltaf jafn flott eins og áður hefur komið fram sennilega. Setti inn nokkrar myndir af henni í gær ásamt einhverju fleiru.
Læt þetta nægja í bili og bið ykkur vel að lifa.

Skrítið!

2006-09-04T19:42:00.001Z

Svakalega er margt skrítið, bara svo þið vitið það!
Komum frá Kjörseyri í gærkvöldi eftir rólega helgi þar. Var hið besta veður nema hvað helv... lognið náði alveg ótrúlegri ferð inn Hrútafjörðinn! Annars tók ég svo sem ekki mikið eftir því þar sem ég fór varla út úr húsi alla helgina.
Við fórum með stelpuna í ungbarnaeftirlit í dag. Hún er orðin 4505 gr og 55,5 cm. Þetta er, að mér skilst, nokkuð eftir normalinu sem hjúkkan var með þarna á einhverju blaði. Hún stækkar semsagt eins og á að gera og stendur sig rosa vel. Síðan er að koma í ljós svoldið skap í dömunni. Er ekkert að fara í felur með það ef henni mislíka hlutirnir. Getur svo sem vel verið að ég hafi verið svoleiðis þó mér þyki það ólíklegt! Getur svo sem vel verið að þetta hafi hún frá mér þó mér þyki það ólíklegt! Annars er það ljómandi gott ef hún hefur skap til að láta taka mark á sér.
Verður ekki meira að sinni. Hafið það sem best.

Tvímánuður....

2006-09-01T13:39:00.000Z

..hálfnaður sem merkir að loksins fer þessu sumri að ljúka. Hver er ekki búin að fá ógeð á steikjandi sól og hitamollu dag eftir dag síðan nánast á sumardaginn fyrsta. Nei nú er þessu vonandi lokið og við tekur haustveðrið með allri sinni dýrð. Því fylgja svo að sjálfsögðu smalamennskur, rollurag, hestaat, gult lauf, taka upp kartöflur, Magni kemur heim og margt fleira sem aðall íslenskrar þjóðar tekur þátt í!
Úr því að ég nefndi Magna er ekki úr vegi að óska honum, ásamt öllum þeim sem kusu hann, til hamingju með árangurinn. Vona bara innilega að hann komist ekki alla leið. Las einhversstaðar að einhver sparisjóður ætli að styrkja hann og fjölskylduna. Er nú hræddur um að maður yrði tekinn á teppið hjá bankastjóranum ef manni dytti í hug að eyða peningunum sínum í svona vitleysu. Gaman samt fyrir Magna að fá borgað fyrir að liggja í sundlauginni þarna úti, drekka bjór og spila pool.
Hér er allt ljómandi að frétta, sú stutta stækkar í allar áttir og er alltaf jafn ljúf og falleg. Að vísu varð hún einkennilega lítil og nett eftir að frændi hennar fæddist. Sá er aldeilis engin smá bolti, enda er nú ekki langt að sækja það :)
Við erum að fara norður á Kjörseyri um helgina hafa það gott. Vona að tengdamamma hafi náð að steikja nokkrar kleinur áður en eldavélin bilaði!
Hafið það sem best, kær kveðja héðan til ykkar.

Þyngdarlögmálið........

2006-08-25T00:16:00.000Z

.. er eitthvað að stríða mér um þessar mundir. Ég hef minnkað einhvern helling í sumar, allavega passar ekki lengur saman hjá mér þyngd og hæð. Ekki það að staðan hafi verið neitt sérlega góð í sumarbyrjun! Helst er ég þó á þeirri skoðun að vogin sem til er hér á heimilinu sé kolvitlaus. Okkur datt í hug að prófa að vikta stelpuna eftir að hún kom úr baði og tölurnar voru ca 4,5kg +/- 3,0kg! Hún var ekkert sérlega ánægð með svona meðferð (stelpan sko)! Annars er allt ljómandi að frétta af henni, gerir allt sem svona ungabarn á að gera þannig að við erum voða hamingjusöm. Nei það er ekki búið að nefna hana og verður ekki gert. Hún fær sitt nafn/nöfn þegar hún verður skýrð. Nei það er ekki búið að ákveða daginn, en gera má ráð fyrir að það verði fyrir jól!
Ingþór, Lísa og Berglind Björk kíktu í stutta heimsókn í dag og þá lét hún nú svoldið í sér heyra, þannig að það er skap í henni (man ekki eftir mér svona, ekki það að ég sé að meina neitt sérstakt).
Nú erum við skólakrakkarnir á heimilinu byrjuð í skóla, ég byrjaði á mánudaginn, Lilja og Arnar á miðvikudaginn. Vinnuferðirnar búnar og reynt að koma hlutunum í fastar skorður.
Við ætlum að skreppa vestur í Fagradal um helgina og gæta búsins á meðan heimilsifólkið bregður sér af bæ. Verðu ljómandi gaman að slaka á þar. Síðan er svipuð ferð fyrirhuguð á Kjörseyri helgina eftir, þannig að við verðum lítið í bænum næstu helgar því það styttist í leitir.
Ég setti inn nokkrar myndir úr hestaferð sem farin var frá Kjörseyri fyrir stuttu. Styttist í myndir af stelpunni vona ég.
Læt þetta nægja í bili og hafið það sem best.

Tveimur börnum síðar...........

2006-08-20T23:46:00.000Z

Já það hefur töluvert gerst síðan síðast þó ekki sé ýkja langur tími liðinn. Við fjölskyldan höfum verið einstaklega mikið lítið í bænum og þegar svo er þá verður maður latari við rit og tölvustörf.
Einstaklega ánægjulegt er að bjóða velkomin í heiminn Emilíu Elvars&Hörpudóttur en hún fæddist þann 10. ágúst. Linda og Ottó eignuðust síðan gutta í gærkvöldi og óskum við þeim öllum innilega til hamingju með þennan frábæra árangur. Eins langar okkur að óska þeim Kollu og Steinu til hamingju með athöfnina á laugardaginn og ekki laust við að maður sé hálf svekktur að hafa skrópað eftir að hafa fengið lýsingar á kvöldinu.
Nú eins og áður sagði þá höfum við lítið verið hér á suðvesturhorninu undanfarið. Inga skrapp í nokkra daga með þá stuttu í skoðun. Hún fékk ágætis einkunn, þyngist og lengist eins og á að vera. Hestar komu töluvert við sögu í ágúst og fengu flestir að koma með einhverjum hætti að hestaferðum hingað og þangað. Þetta var að sjálfsögðu stórskemmtilegt eins og vanalega og má búast við myndum fljótlega. Eins er ekki ólíklegt að bætist við myndir í flokkinn "prinsessan" og "ferðalög".
Nú nú skólinn fer síðan að bresta á (kl. 8.15 í fyrramálið) og hjá yngri deildinni á heimilinu hefst baráttan síðan á miðvikudaginn.
Læt þetta nægja í bili og megi þið eiga gott haust.

Miðsumar/Heyannir

2006-08-09T23:57:00.000Z

Vá sumarið að verða búið og þar af leiðandi vinnan sem líkur í næstu viku. Við fórum vestur í Fagradal um verslunarmannahelgina og á sunnudeginum á Kjörseyri. Inga og krakkarnir (allir þrír) voru eftir þar þegar ég fór suður. Við Gunni erum búnir að vera svo duglegir að vinna af okkur að ég kemst aftur norður á morgun. Þar eru flestir að undirbúa hestaferð sem áætluð er um helgina og maður fylgist væntanlega með henni eftir bestu getu.
Stelpan er hin sprækasta og dafnar vel, þyngist og lengist eins og vera ber. Við hittum Hönnu Björg frænku hennar þegar við vorum í Fagradal og ekki laust við að örlítill stærðarmunur væri á þeim!
Þegar þetta er ritað er ég að horfa á æsispennandi (og Magnaðan) þátt á Skjá1. Gaurinn að austan fékk að syngja aftur og er alveg merkilega góður. Ekkert smá gaman fyrir hann að fá svona góða dóma hjá þessum snillingum sem tjá sig varla nema í bundnu máli eða þannig. Svo virðist sem Magni haldi áfram í þessu og óska ég honum til hamingju með það.
Ætla að láta þetta duga í bili. Laumaði inn nokkrum myndum frá verslunarmannahelginni.

Bæsikkel

2006-07-30T23:14:00.000Z

Heyrði í fréttunum í gær að mótorhjólum hefði fjölgað allverulega hér á landi undanfarin misseri. Einmitt, eins og við höfum ekki tekið eftir því. Held að það sé í lögum hjá öllum mótorhjólafélögum að spyrna upp brekkuna hér fyrir utan og helst að búa til sem mestan hávaða, helst nokkrum sinnum á kvöldi. Þegar það er pása í spyrnuæfingunum hjá þeim verður nær undantekningarlaust óhapp eða slys hér fyrir sunnan hæðina því að sjúkra- lögreglu- eða slökkviliðsbílar þvælast hvor fyrir öðrum þegar þeir væla blikkandi hjá! Gunni Bigg (eða Gunni Bæjó eins og hann er stundum kallaður) lét setja moldarhrúgu hér fyrir utan sem gerir takmarkað gagn. Vona að skrjáfið í ánamöðkunum vekji hann á nóttunni hér vestar í bænum.
Fór nokkur tími hjá mér áðan í að reina að laga hljóðið í sjónvarpinu. Hefði ekki þurft þess, voru víst bara tónleikar með Sigurrós. Tók smá tíma að róa stelpun og svæfa.
Annars er ljómandi að frétta af stúlkunni, borðar og sefur eins og vanalega. Við fórum með hana á rúntinn í barnavagni í gær og til Binna langafa hennar í dag, ekki í barnavagni samt. Svo komu Siggi, Kristín og börn í heimsókn í dag, Kalli og Steina og börn í kvöld. Brjálað að gera þó svo að stelpan tæki þessu öllu frekar rólega. Þetta kom sér samt vel fyrir mig því ég fékk afsökun til að græja vöfflur og ýmislegt gúmmelaði fyrir gestina, plús kaffið og bakkelsið hjá Binna. Verð að passa mig að enda ekki í þriggja stafa tölu á viktinni í lok sumars.
Já það er rúnturinn enn og aftur hjá mér í fyrramálið. Flug á Akureyri og smotterí þaðan fram í Öxnadal. Síðan liggur leiðin austur á Djúpavog og vegirnir þaðan teknir suður á bóginn. Ætlum samt að taka styttri útgáfuna af vinnuvikunni að þessu sinni og verðum vonandi komnir heim á fimmtudag. Á ekki von á að við þræðum útihátíðirnar mikið þetta árið, en væri ekki leiðinlegt að komast út úr bænum. Tja ég þarf svo sem ekki að kvarta en gaman væri fyrir Ingu að sjá og heyra í venjulegum fák í stað mótorfáks eitt kvöld eða svo!
Bless í bili

Tíminn líður hratt (hraðast þó um helgar)

2006-07-24T08:21:00.000Z

Þá er enn ein vikan liðin og helginni lokið sem henni fylgir. Þetta þíðir það að ég er að yfirgefa stelpurnar eina ferðina enn, flýg norður á eftir. Okkur hefur gengið ágætlega í þessari yfirferð okkar um þjóðvegi landsins. Kláruðum Skagafjörðinn í síðustu viku og framundan eru Húnavatnssýslur sem við ætlum að reyna að klára alveg í Brú (að mestu) í þessari viku. Maður á sjálfsagt eftir að heilsa uppá einhverja sem maður þekkir á þessum slóðum, ef maður þekkir mann rétt!
Hér heima er allt ljómandi að frétta. Stelpurnar dafna vel og eru hörkuduglegar. Sú stutta lét aðeins heyra í sér í gærkvöldi þegar pabbi hennar var einn með hana. Varð svoldið skelkaður grunar mig, kann ekki alveg nógu vel á þetta þó að bleyjuskiptin séu að komast á hreint hjá honum. Að vísu er alveg ótrúlegt hvernig hann nær að snúa smafellum vitlaust og raða henni í fötin í vitlausri röð, en það kemur allt saman.
Ætli þetta dugi ekki í bili, verð víst að fara að koma mér í flug.
Heyrumst síðar.

Vatnavextir

2006-07-15T14:46:00.000Z

Það er ýmislegt sem maður lendir í fyrir norðan. Þessi mynd er tekin í einum af þeim fjölmörgu Eyjafjarðardölum sem við "fundum" í síðustu viku. Blessuð Octavían hafði lítið að gera í þessa leið, en sem betur fer var kominn nýr vegur við hliðinna á þessu vatni! Fleira "skemmtilegt" gerðist nú reyndar í ferðinni. Við gistum eina nótt á Laugum og þegar við komum út um morguninn þá var bíllinn rafmagnslaus. Við prófuðum að láta hann renna í gang án árangurs. Náðum sambandi við mann á staðnum sem kom með starkappla og á meðan fór ég og opnaði húddið, stakk lyklunum í svissinn og lokaði. Helv "tæknibúnaðurinn" í druslunni læsti síðan bílnum með lyklana inni og við með opið húdd, rafmagnslausir með kapplana tilbúna! Fengum náunga á næsta verkstæði til aðstoðar og fyrir rest þá hafðist þetta nú, en get ekki sagt að maður hafi verið ljómandi af gleði eftir þetta ævintýri!
Prinsessan kom heim á fimmtudaginn og er hin sprækasta. Er alltaf jafndugleg eins og mamma hennar sem mesta umsjón hefur með verkefnum hér heima. Við böðuðum hana í fyrsta sinn hér heima í gærkvöldi og það tókst allavega. Fengum öndvegis útbúnað hjá þeim í Þorláksgeislanum til þeirrar framkvæmdar. Amman og afinn í Fagradal kíktu á hana í gærkvöldi. Eins og ég segi þá gengur þetta bara ljómandi nema þá hlest hvað það er voða lítið skemmtilegt að vera svona "helgarpabbi" eða þannig. Setti inn nokkrar myndir frá heimferð og baði.

Heima er best

2006-07-12T22:35:00.000Z

Héðan frá Akureyri er allt ágætt að frétta, en fréttirnar að sunnan eru þó öllu skemmtilegri. Það er allavega mín skoðun því að Inga sagði mér í dag að sú stutta nennti ekki að vera lengur á spítalanum og ætlar að fara heim á morgun. Já það er harka í henni og er farin að drekka allt sjálf og laus við slönguna úr nefinu. Það verður gaman að koma suður um helgina þó ég neiti því ekki að skemmtilegra hefði verið að taka þátt í heimkomunni. Sem betur fer var ég löngu búinn að gera ALLT klárt heima þannig að ég er voða afslappaður hér nyrðra............ eða þannig. Berglind frænka var svo elskuleg að lána okkur bílstól, sem Halldór Ásgeir er vaxinn upp úr, svo hægt væri að koma henni heim. Brynja fór og lét sníða til nýja dýnu í vögguna sem kemur á morgun þannig að þið sjáið að þetta er allt "under controle" hjá manni!
Fleiri góðar fréttir bárust í dag að sunnan, en Gunnhildur frænka eignaðist myndar strák og gerði það bara heima. Innilega til hamingju með það kæra fjölskylda. Annars grunar mig að Gunnhildur hafi ákveðið að eiga heima til að hann yrði allavega á undan heim fyrst að daman okkar svindlaði og kom á undan í heiminn. Snjallt hjá þér frænka :)